Aizawl district tan Ruihhlo Do Ni hmang

Aizawl district tan Ruihhlo Do Ni hmang
Aizawl District Level Task Force on Ruihhlo Do huaihawtin Thawhlehni khan an district huamchhung atan Ruihhlo Do Ni hman a ni.
He hun hmanpuitu Social Welfare minister Lalrinawma chuan ruihhlo chu do hneh har tak angin lang mah se, tha thlah theih a ni lo tih sawiin, “Tha kan thlah rual chuan tuna kan harsatna tawh aia nasa zawkin min tuam nghal dawn a, theihtawp kan chhuah a, kan tanrual a pawimawh takzet a ni,” a ti. Thangtharte ruihhlo bawiha an tan lohna’n chhungkua atanga bul tan a pawimawh thu te, ruihhlo do hna chu tu te emaw bik tih tur chauh niloin, kan zavaia tih theih leh tih tur a ni tih hriat thar a pawimawh thu te a sawi bawk.
District Level Task Force on Ruihhlo Do chairman kalchhuak ta Dr Lalhriatzuali Ralte chuan sawrkarin ruihhlo do kawnga a hmalakna leh ruihhlo do a tul zia a sawi a. Sawrkar hmalakna chu khawtlang leh vengchhung tanrualnaah a innghat thui tih a sawi.
Central YMA president R Lalngheta chuan Mizote chu hnam huaisen inti mah ila, ruihhloin min sah chah chuan hnam ral tur dinhmunah kan ding thei a ni, tiin, ruihhlo do hlawhtling tur chuan midang rin emaw ralban mai chi a nih loh thu leh, mitin mawhphurhna a ni tih hriat tlan a tul thu te a sawi a ni.
He hunah hian Aizawl district huamchhunga YMA branch aiawh mi pahnih theuh, MHIP leh local/ village council aiawh pakhat theuh an tel a. Central YMA leh MHIP Gen. Hqrs leh MUP Gen. Hqrs hruaitute bakah sawrkar department thenkhat aiawh an tel bawk.