August 8-ah No-Confidence Motion kalpui ang

Lok Sabha chuan August 8 leh 10 ah no-confidence motion ngaihtuah dawnin Prime Minister chuan Opposition te zawhna a chhang ngei dawnin a lang.
Lok Sabha business advisory committee (BAC) meeting chuan thutlukna a siam ta a. “No-confidence motion sawihona chu August 8 ah neih \an niin August 10 thleng neih tur niin prime minister-in a chhang let ang,” tiin sawi a ni.
Opposition bloc INDIA a tel Congress, DMK, Left party leh TMC te bakah Bharat Rashtra Samithi te chuan House chuan ngaihtuah nghal se tiin ngenna an lo siam tawh a. Sorkarin legislative agenda dang a ngaihtuah hmasak zawk avangin an sawisel bawk.
Sorkar chuan rules emaw thil lo kalpui tawh dan no-confidence motion thehluh veleha ngaihtuah nghal tur tih a awm lo a ti thung a. Dan ang chuan motion chu theh luh a nih hnu a\anga ni 10 chhunga ngaihtuah tur tih a ni thung.
Lok Sabha-a Congress whip Manickam Tagore chuan INDIA a tel opposition tena Lok Sabha-ah Prime Minister Modi awm ngei an phut a, Manipur issue-a statement siam tura an tih veleh House chu tihtawp a ni tiin, a sawi thung a.
Lok Sabha Business Advisory Committee chu chhunah neih nghal niin hetah hian INDIA alliance te chuan no-confidence motion chu kalpui nghal an ngiat thu a sawi a.
“No-confidence motion hi a tukah kalpui nghal ni se kan ngen zawk a ni,” tiin Tagore chuan a sawi.
Congress leader te chuan 16th Lok Sabha-ah khan TDP tena no-confidence motion an kalpui khan a tuka ngaihtuah turin tih a ni nghal a ti a. “Tihkhawtlai hi a kawnghmang lo. He mi duh lo hian INDIA alliance partner te chu speaker’s business advisory committee a\angin an chhuak tau nghal a ni” tiin a sawi.
DMK leader T.R. Balu chuan business advisory committee meeting a\anga an chhuah tauhna chhan chu sorkar chuan August 8 ah chauh motion ngaihtuah a tih tlat vang tiin a sawi bawk a.
Opposition leaders te chuan Lok Sabha-ah thil lo tih tawh \hin dan chuan no-confidence motion a awm tawh chuan government business tin te hnawlin a awm \hin an ti bawk.