Morocco ep tur India Davis Cup squad
Thla thar September 16-17 chhunga tennis huanga ram leh ram inelna lian Davis Cup-a Morocco hmachhawn tur India squad chu Thawhtanni khan tihchhuah niin, Digvijay Pratap Singh (world No. 535) chu a hnuhnungber atan All-India Tennis Association (AITA ) chuan squad-ah a telh ve leh a; member paruk awmna India team hian Davis Cup World Group II tie-ah Morocco chu Lucknow khuaah an mikhual dawn a ni.
India tana khel tur dangte chu ATP ranking thar bera India top men’s singles player Sumit Nagal (world No. 179), Sasikumar Mukund (world No. 345), Yuki Bhambri (world No. 944), Ramkumar Ramanathan (world No. 573) leh doubles-a world No. 9 Rohan Bopanna-te niin, veteran doubles ace Bopanna tan Davis Cup a khelh tawpna tur a ni nghal.
India top doubles player hian thla hmasa mai khan September thlaa Morocco a hmachhawn zawhah a Davis Cup career a zial fel ve tawh dawn tih a lo sawilawk tawh a ni.
Lucknow khuaah hian India player lui Rohit Rajpal chuan non-playing captain hna a chelh zui leh ang a, Zeeshan Ali chu Indian Davis Cup team coach tur a ni.
AITA thuchhuah chuan Davis Cup 2023 khel tur player thlan an uluk tih sawiin, kil tin atanga thlan chhan awm thei tur an dap piahlamah ranking-a player-te dinhmun, an hman theih dan leh khelh that dan, thlan an nih laia an chetthat mar dan thlengin an en vek tih an puang.
Federation hian thlanchhuah zinga tel ve ta chiah lo player panga – Saketh Myneni, Manad Dehamne, Manish Sureshkumar, Karan SIngh leh Yuvan Nandal-te pawh team zinga an training chhunzawm tur thu an tarlang tel.
Kumin February thlaa khelh Davis Cup 2023 World Group I play-offs lamah Denmark laka 2-3-a tlawmin Indian tennis team hi World Group II-ah an tlahniam a, kha kha kum 2019-a Davis Cup format thar an hman hnua Group II stage-a India tlakhniam vawikhatna a ni nghe nghe.
Tuntuma Morocco ep tur India team-ah hian Denmark an hneh loh tuma khel zingah Prajnesh Gunnes-waran chiah thlauhthlak niin, a aiah Pratap Singh sengluh a ni.
World Group II lamah hian national team 24 an inlan dawn a, an zinga ram 12 hi World Group I playoffs khel turin an tlang chho ang a, a chak lote chan tur chu World Group II playoffs a ni leh ang.
Davis Cup tie-ah hian match nga awmin, pali chu singles match a ni ang a, doubles match khat awmin, heti zat match an khelh hnua match thum tal chak tling chuan tie-ah hnehna an chang dawn a ni.
Davis Cup-a Indian tennis team chetthat ber bernate chu kum 1966, 1974 leh 1987-ah runners-up dinhmun an luah kha a ni.
India tennis squad
Team India: Sumit Nagal, Sasikumar Mukund, Digvijay Pratap Singh, Rohan Bopanna, Yuki Bhambri, Ramkumar Ramanathan
Captain: Rohit Rajpal
Coach: Zeeshan Ali