Mumbai lamah lakhuihthei thawn

Tuichangral Farmer Producer Company hnuaia thar lakhuihthei kg 500 chu Mumbai lama hralh turin Nilaini khan Agriculture minister C Lalrinsanga’n Aizawl atangin a vailiam.
Tuichangral Organic FPC Ltd. sawi danin, lakhuihthei hi thei thlan bika neiin, nikum chhung khan metric ton 30 dawn an tharchhuak a. An FPC hian Khawzawl district-a lakhuihthei ching khaw pariat – Tlangpui, Tlangmawi, Lungtan, Sialhawk, Khawhai, Chalrang, New Chalrang leh Vangtlang te a huam a ni. Nikum khan Clover Organic Pvt. Ltd nen tangdunin lakhuihthei metric tonne 18 an lo thawnchhuak tawh a ni.
Tun tumah hian market zawnna atan lakhuihthei sample quintal 5 Mumbai lamah an thawn a. A lo lachhawng turte hi Josie’s Kitchen, North East Cuisine Mumbai an ni. Beisei anga a kal anih chuan market nghet an hmuh theih phah an inring tih an sawi a. Khawzawl tlangdung lam lakhuihthei hi a tlangpuiin ‘Giant Kew’ variety a ni a, an thlum tui bakah tun tuma an vailiam phei hi chu ‘organic’ lakhuithei a nihna hian an hlutna a belhchhah hle dawn tih an sawi a ni.
Tuichangral Organic FPC Ltd. hian an FPC hmsasawn zel nan food processing lam an bawhzui chho mek tih an sawi bawk a. Tunah hian an FPC kutchhuak – lakhuihthei tui, lakhuihthei jam leh lakhuihthei squash chu reilotea zawrh chhuah theih tura hma lak mek a nih thu leh an product zawng zawng hi ‘organic’ an nih vek avangin Mizoram tana hmasawnna rahbi pawimawh tak a nih thu an sawi.
Kumin April 28 khan Konkuwan Herbs Pvt. Ltd. nen insumdawn tawnna tur (contract farming) agreement an lo ziak tawh bawk a. He an inremsiamna kaltlang hian ‘anchiri’ (Sugandhmantri) market tha tak sawhngheh tum a ni.