I DO TLAT ANG U

BY Zoremi Hmar Zote

Kan do tlat tur chu ruihhlo chi hrang hrang, kan ram min rûn mektu hi a ni. Tun hnaiah YMA lamin tan lain, YMA chhang atangin hma an la a, ruihhlo ti lo turin naupang an intiam a, thil tha a va ni teh lul em! Naupang buchip mai an la nih lai atanga ruihhlo hlauhawmzia leh that lohzia hi kan inzirtir a hun tawh rêng a ni.
Tun hnaiah ruihhlo an man nasa mawlh mawlh hle a, nikum chhung zawnga an man aiin kumin kum chanve chhunga an man hi a tam tawh hial a ni. Ruihhloa sumdawnna hi khawi ramah pawh a hluar vek a, ram changkang zawk kan tihte pawhin an buaipui ve fe mai; zu hi a pawi lo ve tihna lam ni lovin, damdawi hi a pawi zual em em a, an ngheiin an sim ve thei tawh thin lo hi a pawi zualna a ni. A man a to a, ti lo thei tawh si lo an nih avangin chhungkuain a tuar a, ruk ruk a ken tel bawk avangin thenawm khawveng thlengin a nghawng thei a ni. Hralh ruk tur dap reng rengin hun an hmang a, chhungkua an rawk mai piah lamah dawra thil lak mai te, mi ina thil ruk mai pawh hreh lo khawpin damdawi hman sualna hian pawi a tawk thui thei a ni.
Tih chhin loh a him tih hi kan tu leh fate kan hrilh mawlh mawlh a tha e. Vawi khat chhin palh khan vawi hnih a hring a, damdawi kher hi chuan zûn a ngah em avangin an ngai hma a, addict tur hian vawi hnih khat tih chhin bak an mamawh lo an ti. Kan tu leh fate an him em tih hi kan ngaihven reng a ngai a, an nunchang a danglam em tih te, an ni tin nun dana thil danglam a awm leh awm loh kan thlir reng a pawimawh hle. Sawi tawh angin nghei theih tawh loh tluk a nih avangin ruihhlo bawihah hian kan tu leh fate an tâng ang tih hi kan hlauh tak zet a ngai a, Pathian hnena tawngtainaa kan hlan fo mai piah lamah a vena kan ven ve pawh a ngai a ni. Mi fate tih tura kan dah, mi fate chauh emaw addict thei kan tih lai hian kan in chhungah ngei min rawn luhkhung ve thei tih hi hre mai lo va, a pawma kan pawm a ngai.
Damdawi khawih pawi theihzia hi hetia kan ngaih mai ai hian a rapthlak zawk, Pathian min pek kan nun hlu tak tihchhiat vekna a ni a, nunphung pangngaia nung thei lo va hun leh tha, ngaihtuahna leh nun zawng zawng tichhe vektu a ni. A rui thinte chuan an ruihna tur bak an ngaihtuah tawh lo va, mihring nihphung pangngai, inlaichinna te, inzah tawnna te, mihring nuna a mawi lai eng mah an ngaihtuah ve thei tawh lo va, an han rui a, ruih leh na tur an ngaihtuah leh nghal char char a, eng tin tin emaw an han nei leh hram a, a dawt ami tur an ngaihtuah leh a, chutiang reng reng chuan nun an hmang a, an tan pawimawh dang a awm lo va, ngaihtuah dang an nei thei lo a ni. Chuvangin chhungkua leh khawtlangah tangkaina em em an nei thei lo va, chhungkua leh laina, khawtlang leh ram an hmangaihna tur zawng zawng aia damdawi an hmangaih tawh zawk miau avangin an lakah beisei a sang thei lo a ni. Damdawi tiho reng reng hian an lo tih rei tawh chuan a tira nuam an tih ang pawh khan nuam an ti em em tawh lo va, an tih loh vanga buaina (suffer) tawrh a rapthlak em avanga chumi pumpelh nan chauha ti an ni ber tawh thin. Anmahni tak pawh hian hrehawm an ti a, an ning em em a, dam an duh ve thin; mahse han nghei ve ren rawn mah se an taksain a mamawhna leh châkna sosang kha an do zo leh thin lo va, an ti leh nge nge thin a ni, hei tak hi a ni damdawi pawina em em chu.
Engtia han do va, han tihrêm chi nge tih hriat mai pawh a harsa e, a pawimawh hmasa berah chuan kan ram, kan chhungkua a him theih nana Pathian hnena bang lova kan tawngtai reng a pawimawh a, keinin tih ve tur kan neih chu sikul hmasa ber in chhung atanga kan do tan hi a ni. Tunlai khawvelah damdawi hman sualnain min luhchilh thûk tawh em avangin naupang hnena sawi awm leh awm loh pawh a thliar theih tawh meuh lo, kan tu leh fa te, thil hre thiam rual an nih dek dek tawh chuan zu leh ruihhlo chungchang hi sawipui tawh mai tur. An hriat loh tur tur kan lo hrilh hre mai mai tih hi tih loh tur a ni, kan hrilh loh pawhin an hre dawn tho tho a, a that lohzia kan hrilh loh avanga an lo tih ve chhin kha hlauh ber tur a ni.
Heti tak maia Setana a huangtau ta mai hi thapui thawha kan do a, kan tan rual a hun ta tak zet mai, Mizote ngat phei chu kan la tlem si a, zu leh ruihhlo vangin kan mipate an thi phuk phuk mai si, rilru a hahin lâi a na ngawt nia. Kan mipate an harh chhuah a, min tichhe theitu do va, tan an lak loh chuan hmeithai hlir kan la awm ruih ang a, hnam dangin min zuamin min zah lo ngei ang a, zawi zawiin kan hnam a zuih chho tial tial ang, kan mipa ten tan in lak a ngai a, in harh chhuah a ngai. Kan la tlem lutuk, fa te hi hring teuh teuh ang u. Kan rama hnam dang hna thawk tam lutuk chhan pawh hi kan la tlem vang, kan la tam hneh loh vang mai mai alawm; tuak khatin fa hi panga tal hring zel thei ila a tha ngawt ang!