NewJeans-in No.1 album an nei ta

On Aug 4, 2023 25 0

NewJeans-in No.1 album an nei ta
K-pop girl group NewJeans album thar “2nd EP ‘Get Up'” chu Billboard 200 (albums) chart No.1-ah a debut a, he chart-a an album No.1 kai thei hmasa ber a ni. Hetihrual hian Barbie soundtrack pawh No.2-ah a debut a, Greta Van Fleet pawh top 10-ah an lang.
Billboard 200 hi chart hi kar khat chhunga US-a album hralh tam dan atanga tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Tunkar chart ranking hi an tichhuak thei lawk lo va, an rama Pathianni tlai lam, keini tana Thawhtanni tukah ranking hi tihchhuah thin a ni a, mahse, NewJeans leh Barbie album-ah a eng zawk nge No.1 tih a chian theih loh avangin an rama Nilaini zan, keini tana Ningani tukah ranking hi an tichhuak thei ta chauh a ni.
NewJeans “2nd EP ‘Gep Up'” hi kar khat chhungin 1,26,500 hralhin Billboard 200 No.1-ah a debut a, chung zinga 1,01,500 chu album tak tak hralhna niin, streaming atangin 24,500 (on-demand official stream maktaduai 34.39) leh album-a hla mal hralhna atangin 500 a tling thei bawk. Member pali awmna, Korean gril group NewJeans hi tun thla 12 pawh tling lo chhunga he chart-a Korean hmeichhe group he chart-a No.1 kai thei pahnihna a ni a, nikum September khan BLACKPINK chuan an album ‘Born Pink’ an lo No.1 pui tawh a, heng group pahnih te hi tun kum 15 chhunga hmeichhe hlang awmna groupa he chart-a No.1 album nei thei awm chhun an ni bawk.
2nd EP ‘Get Up’ hi hla paruk awmna hiin, a hlate hi Korean deuh vek a ni a, English lyrics tlem a tel a, kuminah he chart-a English hla tel mang lohna album he chart-a No.1 kai thei palina a ni a, heng album pali zinga pathum chu Korean album niin, Stray Kids ‘5-Star’ leh TOMORROW X TOGETHER ‘The Name Chapter: Temptation’ te an tel a, a dang pakhat chu Karol G ‘Manana Sera Bonito’ a ni ve thung.
2nd EP ‘Get Up’ hi NewJeans album he chart-a lang thei hmasa ber a ni a, chutihrual hian album an tlangzarh hmain Billboard chart dang, Hot 100 (singles) chart-ah he album-a an hla ‘Super Shy’ a lo lang tawh a ni.
Zaithiam lar rualin aw an thawhna Barbie movie soundtrack album pawh 1,26,000 hralhin No.2-ah a debut. He album-ah hian Billie EIlish, Dua Lipa, Lizzo, Nicki Minaj, Ice Spice leh Sam SMith te pawhin an aw an thawh a, he film-a changtupa Hollywood star Ryan Goling-a’n hla pahnih chu a thawh ve nghe nghe a ni.
Hla 19 awmna Barbie soundtrack album hi 70,000 chu streaming atanga album tlukpui (on-demand official stream maktaduai 93.81) niin, album tak tak hralh zat chu 53,000 a ni a, album-a hla mal hralhna atangin 3,000 a tling thei bawk.
Chart No.1 hlui Morgan Wallen ‘One Thing at a Time’ chu 1,03,000 hralh lehin No.2 atangin No.3-ah a tawlh a, he album hi an tlangzarh atanga kar 21 chhung chu kartin 1,00,000 an la hralh tling ziah a, hetiang tithei album awm chhun a la ni.
Chart No.1 hlui bawk Taylor Swift ‘Speak Now (Taylor’s Version)’ chu 79,000 hralh lehin No.1 atangin No.4-ah a tawlh a, Peso Pluma ‘Genesis’ chu 53,000 hralh lehin No.3 atangin No.5-ah a tawlh a, chart No.1 hlui Taylor Swift ‘Midnights’ chu 49,000 hralh lehin No.4 atangin No.5-ah a tawlh a, chart No.1 hlui bawk Morgan Wallen ‘Dangerous: The Double Album’ chu 47,000 hralh lehin No.5 atangin No.7-ah a tawlh ta bawk.
Greta Van Fleet album thar ‘Starcatcher’ chu 45,000 hralhin No.8-ah a debut a, 41,000 chu album tak tak hralhna niin, streaming atangin 4,500 (on-demand official stream maktaduai 5.83) tlingin, he chart-a top 10 kai thei album pathum a neihna a ni.
Chart No.1 hlui SZA ‘SOS’ chu 42,000 aia tam deuh hralhin No.7 atangin No.9-ah a tawlh a, chart No.1 hlui Taylor Swift ‘Lover’ chu 42,000 hralh lehin No.6 atangin No.10-ah a tawlh ta bawk.