Kharge an Prime Minister Modi chhang let

Indian National Developmental, Inclusive Alliance (INDIA) bloc chu na taka beiin Prime Minister Narendra Modi chuan Opposition thenkhatte chu “negative politics” khelah puhin tunah chuan ramin corruption, dynasty leh appeasemnet in India ‘chhuahsan’ se a duh tawh tiin a sawi.
Hei hi chhang letin Congress President Mallikarjun Kharge chan Prime Minister chu tun hnai kum 10 chhunga ‘negative politics thendarhna’ kalpuiah a puh ve thung.
“vanduaithlak takin kan ramah Opposition te engmah tihtum lo leh midang ten thil an tih pawh remti lo an la awm a. Chu rilru chu an kalsan thei lo,” tiin Modi chuan railway station 508 tihchangtlunna tur project hawnna a neihah a sawi a.
INDIA group hming hmerha sawi lang chiah si lovin Prime Minister chuan opposition te chuan Parliament building thar te, central vista Kartavypath chehhvela siam te Rajpath thar te chu an dodal a, India Gate bula war memorial siam te, Sardar Patel hriatreng nana Gujarat a State of Unity te pawh an dodal tiin a sawi bawk a.
“Quit India Movement ang khan ram pumin tunah chuan sual tin reng, eirukna, dynasty, appeasement te lakah Quit India duhin an au tawh a ni,” tiin Modi chuan a sawi bawk.
Tun hnaia neih tur Partition Horror Remembrance Day chungchang pawh sawiin kha thil thlen hnua mipuite hnathawh chu an hriat reng thu sawiin tunah chuan ram hmasawnna thlentu an nih tawh thu a sawi bawk a.
Modi thusawi hi chhangletin Kharge chuan, “Tun hnai kum 10 chhungin negative politics tihkeh bak i kalpui lo. INDIA lakah i lak tangin thu kha tak tak a lo chhuak leh ta,” tiin a sawi bawk.

Manipur buaina
Congress chief chuan Prime Minister hian tun hnai thla thum chhungin Manipur buaina a chingfel thei lo va, indona hmun ang mai ni mekin mi 150 chuangin nunna an chan phah tawh, a ti bawk a.
Haryana (Nuh) ah communal buaina a thleng mek bawk tiin Congress chief chuan sawiin Sangh Parivar te chuan heng lai hmun buaina awm ngailohnaah buaina an chawkchhuak a ni, a ti bawk a.
Modi sorkar hian unemployment, inflation, economic inequality, retheihna, hmeichhiate himlohna leh Dalits te bawhbeh bak tih a nei lo, a ti bawk a.
“Mipui nawlpui an lawm lo va. Harsatna sutkian ai chuan Prime Minster hian ni tinin eng emaw thil thar hawn tur a zawng reng a, sorkar function ah pawh politics rawlh zelin Opposition te beih nan a hmang zel” tiin Kharge chuan a sawi bawk a.
Kharge chuan BJP idiological forefathers te chuan British an thlawp a, Quit India hnawlin Mahatma Gandhi thahnaah pawh rinhlelhawm an ni, a ti bawk a.
“Kum 75 chhunga Quit India hriat reng loh kha an hre thar leh thut bawk a. Hei hi kan hnehna a ni,” tiin Kharge chuan a sawi a ni.