‘Barbie’-in $1B a lalut tling ta ‘Oppenheimer’ pawh record a siam
‘Barbie’-in $1B a lalut tling ta
‘Oppenheimer’ pawh record a siam
Ryan Reynolds leh Margot Robbie channa ‘Barbie’ film chuan tun weekend kalta khan North America-ah cinema hall ticket hralhna atangin dollar maktaduai 53 lalutin, box office No.1 a ni a, ‘Oppenheimer’ pawh No.3 la ni mah se Khawvel Indopui Pahnihna film an siam tawh zinga sum lalut hnem ber a ni ve ta bawk.
‘Barbie’ hian US-ah kar thum chhungin dollar maktaduai 459.4 a lalut tling tawh a, US pawnah dollar maktaduai 572.1 lalut tawh bawkin tihian thla khat pawh tling loah cinema hall ticket hralhna atangin khawvel huapin dollar tluklehdingawn 1.03 a lalut ta der mai a ni. He film hi kumina film tlangzarh zinga dollar tluklehdingawn chin lalut thei pahnihna niin, The Super Mario Bros. Movie-in dollar tluklehdingawn 1.35 a lo lalut tawh bawk a ni.
‘Barbie’ hi live-action film, hmeichhia-in amah chauha a direct zingah dollar tluklehdingawn lalut thei hmasa ber a ni a, US bikah chuan hmeichhe director kutchhuak live-action film zinga sum lalut hnem ber a ni tawh bawk. A hmaa hetiang record siamtu chu Patty Jenkins direct ‘Wonder Woman’ kha niin, US-ah dollar maktaduai 413 a lalut thei a ni.
‘Barbie’-in khawvel huapa cinema hall ticket hralhna atanga dollar tluklehdingawn a lakluh ve leh takah chuan hetiang zat sum lalut thei film hi 53 a awm ta a ni.
Film tlangzarh thar Meg 2: The Trench-in dollar maktaduai 30 lalutin No.2-ah a debut a, he film hian US pawnah dollar maktaduai 112 a lalut bawk a, tihian khawvel huapa opening weekend-a a lakluh chu dollar maktaduai 142 a tling. He film hi dollar maktaduai 129 senga siam a ni (marketing chhut tel loin).
Christopher Nolan direct, atomic bomb siamtu Oppenheimer chanchin behchhana film an siam ‘Oppenheimer’ chu dollar maktaduai 28.7 lalut lehin No.3 a la ni a, he film pawh hian US-ah dollar maktaduai 228.6 a lalut tling tawh a, US pawna a lakluh nen chuan dollar maktaduai 552.9 a tlin tawh a, World War II film an siam tawh zinga sum lalut hnem ber a la ni. A hmaa he record siamtu chu Nolan-a direct tho ‘Dunkirk’ kha niin, dollar maktaduai 527 a lalut thei a ni.
Teenage Mutant Ninja Turtles: Mutant Mayhem-in dollar maktaduai 28 lalutin No.5 a ni a, US pawnah dollar maktaduai 8.2 lalut bawkin, Nilaini leh Ningani-a a lakluh nena belhkhawm chuan dollar maktaduai 51.3 a tlin ve nghal der tawh bawk.
Box office top 10:
1 Barbie $53,000,000
2 Meg 2: The Trench $30,000,000
3 Oppenheimer $28,700,000
4 Teenage Mutant Ninja Turtles: Mutant Mayhem $27,950,000
5 Haunted Mansion $8,971,000
6 Sound of Freedom $7,032,000
7 Mission: Impossible Dead Reckoning Part One $6,450,000
8 Talk To Me $6,272,000
9 Indiana Jones and the Dial of Destiny $1,521,000
10 Elemental $1,211,000