MIZORAM POLITICS HMELHMANG

By Imanuel Lalrinpuia
V Semester
Department of Political Science
Govt. Aizawl West College

Mihringte hian duhthusam ram (ideal state) kan nei vek a. Hmanlai Greek mifing ho (philospher) pawn an suangtuahna a an lo din thin ram hi an lo nei deuh vek a. Chutiang an duhthusam ram chu a thlen tir tum ngei ngei lam pawh a kawk chuang lo. Chutiang bawkin kan ram politics hmelhmang han en hian duhkhawp lohna tam tak kan nei vekin a rinawm. Khawvelah hian duhthusam ang tak hi chu engkawngah pawh hian a awm theih loh tih erawh hi chu kan hriat thar a pawimawh.
Politics kan tih hian a sawi tum leh a kawh ber chu mimal leh vantlang thatna tur a sawrkar hmanga inrelbawlna hi a ni. Politics-a inhmangte chu ram leh mipuite rawngbawltute an ni. Ram leh mipui rawngbawlna hi Pathian rawngbawlna nena inang, rawngbawlna thianghlim leh zahawm a ni. Pathian rawngbawl turte chu a rawngbawl tura Pathian kohte an ni thin. Chutianga Pathian kohna hmu lem lo te’n Pathian rawngbawl hna an thawh chuan rah tha a thlen thei ngai lo thin. Tin, politics luhchilh a, ram leh mipui rawngbawl hna thawk turte pawh an rawngbawl hna tha tak leh a nih tur ang taka an thawh theih nan mahni hmasial lo leh mi rinawman nih a tul hmasa phawt a. Hetiang mi hi an nih loh chuan thiamna sang tak nei, hausa tak leh fing tak pawh ni se, ram rawngbawl hna a nih tur ang takin an thawk thei ngai lovang. Politics hi a nihna dik taka kalpuia mahni hmasial lova ram leh mipui rawngbawl nana hmang thei hi khawvel ram pum huapa thlir pawhin sawi tur an tam lo hle.
Tuna kan ram inrelbawl dan hi ‘parliamentary system of democracy’ a ni a, hetiang ram inkaihhruainaah hi chuan political party neih hi a tul a. Political party-te chuan party Headquarters-ah te, District-ah te, Block-ah te leh khaw tinah hruaitu thlan tlinte an nei thin. Kum 1947-ah India hian British atang zalenna a hmu a; Mizo-te pawh hian politics kan lo hmelhriat tan vein political party-te pawh kan din ve tan a ni a. Lal rorelna banin khaw tinah village council-te kan lo neiin ram pum huapin District Council te kan lo nei ta a ni. District Council kan neih kum 1952 atanga kan tun hun politics hi han thlir ila, duhthusam chu a ni lo chiang mai a. Kan politics khelh dan leh kalpui dan hi thlak hlawk hlawk (reformation) ngai hi a tam a ni. Kan politician thenkhat phei chu vote hmuhna tur a nih dawn phawt chuan an hmelhriat lem loh thi te pawh puan leh pangpar kengin an vui zel a; an ral zui zel bawk a. Dam lo hlek pawh an zawng thin emaw tih mai turin an hre thei em em a, engemaw humin an kal zel thin. An kalphung chu Pathian thu nen inpersan daih a ni chungin; a zavaia Kristiante ngaiha mawiah biak ina inkhawm an peih hle a, thusawi hun chang tur te pawhin tan an la nasa hle thin. Kohhran upa nih phei chu ‘passport’ tha tak nia ngaiin kherh chi kimin an kherh thin (R. Lalmanzuala, 2003). MLA nih a, Minister chanvo chan chu ram leh mipui rawngbawlna tak tak chauh ni dawn ta se, hetiang ti tur hian an in atanga pawh chhuah zawh pawh ni hlawm lo maithei a ni.
Tin, kan politician-te mai bakah a mipuite pawh hi kan inenfiah ve hi a ngai a. A nihna takah chuan tuna kan kalphungah hian mipuite zawk hi kan rinawm lo ve tho em maw ni le aw a tih theih. Kan hmelhriat zing ami hruaitu atana thlan tlin theih tur awma kan ngaihte chu kan belbul a. Thlan tlin an nih hnua keimahni mimal thila kan tangkaipui theih dan tur thlir lawk ranin an lam tangah kan insiam a. An rinawm lohna te, an thiam tawk lohna te leh an tlin tawk lohna te chu hre sa reng chungin kan haider lui ta thin a ni. Hetiang kalphung atang hian ram leh hnam mipuite tana thil tha tihna kawng a kaw thei lo va, chhiat zual zelna kawng zawhna a ni zawk. Tichuan insiamthatna kawng tura hna thawk thei tur ngei, mi rinawm, mi thiam leh tling kan thlan thiam a ngai takzet a. chutiang ti tur chuan keimahni hmasialna leh hamthatna tur kan dah bo phawt hi a pawimawh a, ram leh mipui thatna chu mimal thatna ni tih hre reng chungin mimal hmasialna leh tanghma um hmasa lova ram leh mipui thatna atana kan inpek hmasak a ngai a ni.
Hun kal taa kan hruaitu hmasate leh ni mek te plan leh policy tam tak zuih ral ta te kha han ngaihtuah chian chuan a uiawm duh hle . Kan ram hruaitu hmasa leh hruaitu la ni mek te hian hna an thawk lo a, thil tha an ti lo chu kan ti thei lo ang. Ram tan thil tha tih pawh an nei ve na meuh mai; amaherawhchu thil tam takah duhkhawp lohna hi mipuite lakah hian a tam em em mai a. Khang ‘plan’ leh ‘policy’ tha tak tak an lo neih te kha tih hlawhtlin vek ni thei se chu kan ram hi mahni kut leh kein kan ding thei daih tawhin a rinawm. Tun dinhmunah pawh hian mahni intodelhna em em sawi tur hi kan la nei theih meuh lo chu a ni. Kan harhchhuah a hun tawh hle a ni. Tin, kristian kan nih ang hian kan politician-te pawh hian mipuite laka an thutiam te hi hlen thin se; hlen theih loh tur erawh tiam tawh lo bawk se. An tih theih loh tur (an tih hlawhtlin tum tak loh) tur hi mipuite hi sawi hmuh fo lo se tih hi mipuite duh dan pawh a ni ang. Tin, an tih hlawhtlin duh tak tak loh tur an tiam hian dawtsawina chi khat a ni. Chu chu Pathian duhloh zawng leh bible pawn a khap tlat hi a ni.
Tin, Mizo-te hian kan Kristianna hi kawrah kan hmang tih hi mi tam tak pawm dan a ni ngei ang. Kohhran leh Politics hi kan thenhrang phawk niin a lang. Kohhran pawnah chuan engtiang pawhin han awm mah ila pawi tihna leh Pathian hlauhna tak tak hi kan tlachham thin hle a. A pawimawh berah chuan kan kristianna hian Kohhran huang chhung hi pel ngam ve tawh sela; kohhran huang chhunga Pathian leh mipuite kan zah ang hian pawn lama kan nun pawh hian chutiang nun chu a chhawm tel zel hi a tulin a pawimawh takzet tawh a ni. Kristian rama thil thleng atan chuan thil zahthlak leh kristianna nen a thil in rem lo tak a ni bawk a ni. Tin, Pathian kan tih tak tak loh avangin dam chhung khawsak lungkhamnaah buaiin, dam chhung daih lo ro thil awhna sualah kan lut a, kan tih loh tawp tur thil dik lo kan tih phah fo thin a ni. Pathian hi tih ila, a thupekte zawm ila, Pathian lal berna hi pawm ila, fel taka rem min ruatsakna hnuaia kan intuk luh chuan sual tam tak lakah kan him sa ngei ang (F. Vanlalrochana, 2022).
Tin, mi rethei leh hausa inkar zau lutuk te, thuneihna hman diklohna leh thlei bik neihna (nepotism) te hi ram hmelhma leh ram hmasawnna ti thuanawptu hi a ni. Ram hmasawn nan hian Kohhran mai bakah politics kaltlang a ram siam that hi a pawimawh takzet a. Politics tel lo chuan ram hian hma a sawn thei lo a; ram siam tha thei tu pawh hi politics bawk hi a ni. Politics hi ram hmasawnnana a ruhrel (structure) pawimawh ber a ni a tih theih ang. Chutiang khawp a pawimawh leh dinhmun pawimawh luah si hian a pawimawhzia hi hriat a ni lo fo. Kan politician-te pawh hian politics pawimawhzia hi an hriat nawn fo hi a pawimawh awm e. |halaite zingah pawh politics hi eizawnnan (career) chauh ni lo, ram hmangaih tak tak avanga politics an luhchilh ngam hi a ngai tawh a ni. Neih belh duh vang leh nawmsak duh vang ni loa chan huam leh retheih tak tak huam a politics luhchilhtu an tam hunah ram hian hma a sawn ngei ang. Tin, politician ram hmangaih tak taktu leh hna thawk tha ho hi hriat reng an ni fo thin a. Mihring hi rei lo te atana vaivut atanga siam kan ni a, he kan hun neih tawi teah hian mite hriat reng tlak nih hi kan duhin kan chak berte zing ami a ni ti ila a sual awm lo e. Chuvang chuan khawvelah hian hriat reng tlak (thil tha lam) tur engemawni hnutchhiah hi kan duh vekin a rinawm; chutiang chu mi thenkhatin an tum ber pawh a ni.
Kan politician-te pawh hian a tha lam zawng hriat reng nih an duh chuan tuna aia tha lehzuala tan an lak a ngaiin ka hria. Fam ta amah Kaphleia khan a essay ‘Thlirtu’ tawp lamah heti hian a ziak a: “ Khawvel hi eng lai pawhin siam that a ngai reng a, that lutuk tih reng a nei lo vang. Mi fingte thu leh mi tha leh taima thil tih hian a vawng tha hram hram a ni a. Kan dam rei leh rei loh te hi kum te, thla te hian a hril lo e, kan thu leh kan thiltihin a hril ber zawk a ni. Mi kum tam tak nung mah se, thenawm khawveng tan, a ram tan leh khawvel tan thil tha a tih si loh a, thufing a sawi si loh chuan tu nge a dam hria ang? A thih veleh miten an theinghilh nghal ang. Mi fing leh mahni ram tana thil tha titute erawh chu khawvelah hian nung rei lo mah se, an thih hnu pawhin an nung reng ang; chu chu a ni dam rei chu”, tiin. Kan politician te pawh hian mahni sahmim puarna tur leh neih belhna tur ringawt ni lo a, ram tana an chan ngam a, an neih tlem belh ngam a nih phawt chuan an thih hnu pawhin an nung reng tawh ang.
A tawp berah chuan khawvel hi mi famkim lo te famkim lohna ram a ni a, amaherawhchu a famkim lo lai leh siam that ngai lai te siam that hna hi ringtute tih tur a ni tih hi kan hriat nawn leh hi a pawimawh hle a. Kumin kum tawpah hian inthlanpui kan hmachhawn turah hian politician te mai pawh a ni lo a mipuite pawh hi kan danglam ngam hi a hun ve tawh takzet a. Party mi leh sa ah ringawt buai tawh lovin, mi tha leh rintlak tur hi kan thlan ngam a ngai tawh a ni. Tin, Mizoram thanmawh bawk berte zing ami ‘party-based-politics’ hi kalsan ngam a hun tawh a; kan party mi leh sa ni lo mi tha leh rintlak an awm chuan kan vote ngam a hun tawh a ni. Tin, Pathian nung zuitu kan nihna ang taka Pathian tih mi tak hnenah kan vote hlu tak hi hlan theuh tum ila, chu chuan kan Zoram chhung mai ni lo khawvel hriatah Zoram hmel hi a lo danglam chho anga, kan politics leh kan ram hmel hi khawvel mithmuhah a mawi chho dawn em em a ni.

“Lenrual duhte u tho ru,
Raltiang i kai ve ang”.
Rokunga

Works Cited
Chaltuahkhuma. (2001). Political History of Mizoram. Aizawl; David Memorial Press.
A. Thanglura. (1999). Zoram Politics lumlet dan; bel keh phuar khawm tui pai thei lo. Aizawl: MCL Publications.
P. Lalnithanga. (2008). Mizorama Politics inlumleh chhoh dan. Aizawl; Lengchhawn Press.
Lalthara. (2021). Kan ram leh hnam humhalh nan. Aizawl; Diktawn Press.
M. Lalmanzuala. (2003). Zoram Kalsiam – 3. Aizawl; Lengchhawn Press.
Kaphleia memorial Trust. (2002). Kaphleia Kutchhuak Kimchang. Aizawl; Fraser Media and Publication.
F. Vanlalrochana. (2002). Zofate u, Finna zawng ula. Aizawl; Frasher Media and Publication.