Nupuiin pasal ‘hang’ tih vangin inthen remtihsak

Karnataka High Court chuan a nupuiin a pasal ‘hang’ a tih khum chu inthenna tham tia sawiin inthen remtihna a pe.
High Court chuan mipa kum 44 a upa chu a nupui kum 41 a upa then remtihna a pe a.
Nupui hian a pasal chu vun hang a neih avangin a hmusita chu mai ni lovin a chhan dang pawh sawi lovin a pasal chu a awm hran san tiin court chuan a sawi bawk a.
“Chung te thup nan chuan nupui chuan a pasal chu ngaihzawng neiah a puh zui zawk a ni. Heng thudik lailan te hi nunrawnna pholanna a ni” tiin HC chuan Section 13(i)(a) of the Hindu Marriage Act hnuaia inthen a remtihsak a.
He mite nupa hi kum 2007 khan Bengaluru-ah inneiin fa hmeichhe naupang an nei a. Kum 2012 khan pasal zawk hian Bengaluru a Family Court-ah inthen a dil tawh a ni.
A ngenna hi Division Bench of Justices Alok Aradhe leh Anant Ramanath Hegde te chuan ngaihtuahin thutlukna an siam zui ta a.
“A vun han avangin nupui chuan a pasal chu a hmusit a ni. An fanu avang liau liauin a pasal chuan a nupui hmuhsitna chu a tuar a ni,” tiin HC chuan a sawi bawk a.
A nupui erawh thung chuan Section 498A (subjecting a married woman to cruelty) of the Indian Penal Code hmangin a pasal leh a chhungte chu a khing thung a. Hei bakah hian Domestic Violence Act hmangin a khing bawk a ni.
Family Court hnenah hian nupui chuan a pasal leh a chhungte chu amah duh lo leh enkawl tha lo leh a nuna nunrawnna lantirah a puh thung a.
A lakah dowry ngiatin a fanu nena pawna an chhuah dun pawh an rem ti lo a ti a. Hei bakah hian a pasal chuan hmeichhe dang kawpin fa an nei tiin a sawi bawk.
Family Court chuan pasal zawkin kum 2017-a inthen a dilna chu lo hnawl tawhin he mi hnu hian HC hnenah a zualko zui ta a ni. HC chuan a nupuiin a pasal chu ngaihzawng nei anga a puhna chu behchhan nei lo leh finfiahna awm lo tiin a sawi bawk.