Dan loa kuhva tawlhtute danna atan MLA-in sum pe

Hachhek bialtu MLA Lalrindika Ralte chuan a bial chhung, Tuidam leh Kawrtethawveng inkara dan loa kuhva tawlhtute danna tur check gate siamna atan cheng nuai khat a hlan.
Khuarel chhiatna pawh ni lo, mi duham, dan loa sumdawngte sawrkarin a thunun theih loh avanga sum sen a ngai leh hlawh pawh awm loa tlaivara duty a la ngai lehzel chu thinrim thlak a tih thu MLA hian a sawi a. “Kan ram kuthnathawktute tibeidawng zawnga kan rinchhan tur ber sawrkar a awm hi a pawi takzet a ni,” a ti.
Kawrthah South Village Organisation (self help group) in puantah khawl an leina tur cheng nuai khat a hlan bawk a. Theihtawp chhuahin hna an thawk thin tih a hriat thu leh an theih bakah amah pawh an pur chauh tih a hriat thu SHG hruaitute hnenah hian sawiin, “Theihtawpa hna thawktute hi puih an nuam. Hei vang hian Congress party chuan ‘tang puihna’ policy a nei a. Lo tang zel ula, Pathian zara Congress party a sawrkar chuan tang puihna hmangin nasa zawka hna in thawh theihna turin ruahmanna kan siamho dawn nia,” a ti.
Hachhek bialtu MLA hian Kanhmun MUP hnenah MUP Rûn sakna tur cheng nuai khat a hlan a. Kum upate chu khawvel tan an hlu tih sawiin, ram changkang zawkah phei chuan ngaihsak an hlawhin sawrkar pawhin an intihhlimna hmun turte a siamsak thin a, keini ramah chuan hei hi kan la thleng pha chiah loa, tuna a tih theih tawk erawh pawmsak turin a ngen tih a sawi.