Mizoram MP leh ITLF-in Union HM thu chhanglet

Union Home minister-in Manipur buaina chu Myanmar raltlante buaina siam atanga chhuak nia ngaih theiha a sawi chu Mizoram MP K Vanlalvena leh Indigenous Tribal Leaders’ Forum (ITLF) chuan an chhanglet.
Union Home minister Amit Shah hian August 9-a Lok Sabha thutkhawmah tuna Manipur buaina chungchang sawichhuakin, tunhnai kum 6 chhung vel Manipur-ah tualchhung buaina leh helho avanga a awm meuh tawh loh thu leh, curfew puan ngai takngial pawha a ngaih loh tawh laiin, Myanmar-ah sipai sawrkar, Kuki telna in thuneihna a chan hnu ah, ramri hung a nih bawk si loh avangin, Kuki-te hi Manipur leh Mizoramah an rawn lut a, hei hian May 3-a buaina kha a chawk chhuak ta a ni, ti zawngin a sawi a ni.
Hei hi Ningania Rajya Sabha thutkhawmah MP K Vanlalvena hian chhangletin, tribal aiawh, Mizoram MP a nih thu leh Myanmar mi ni loin, India mi an nih thu te, British-in a awp hma daiha helai hmun hi luah tawh a, Myanmar mi an nih loh thu a sawi.
“Myanmar mi kan ni loa, British lo luh hmain kum 200 he ramah hian kan lo awm tawh. India zalen hma in rei tak an awm tawh a, Myanmar mi emaw, foreigner emaw kan ni lo,” a ti. Tun Manipur buainaa biak in 300 hal chu Communist ramah pawh thleng ngai lo, world record thar a ni, tiin, “North East tlangram hi kan ta a ni a, humhalh turin hlauh kan nei lo,” a ti.
Manipura tribal leh Meitei inkara buaina a chhuah hnua, tribal-te inzawmkhawmnaa din ITLF pawhin Union Home minister hi chhangletin, a thusawi duh dan chuan Kuki-Zo hnamte a tilunghnur hle tih a sawi.
‘Thla thum chhung he buaina kal tawhah hian Kuki-Zo hna 130 chuangin nunna chanin, mi 41425-in sahimna zawngin an awmna an tlanchhiat san a, tribal leh Meitei inkarah inenhranna nasa tak a thlen tawh laiin, Myanmar atanga raltlan lut te thiltih anga puh hi a sawi theih awmchhun chu a ni,’ tiin, Manipur buainaa a bul tumtu bera ngaih chief minister Bireng Singh ban loa a la hum tlat zawk chu, party politics piahlam thlir phak turin an ngen tih Amit Shah hi an chah a ni.