CM leh Zoram mipui hnenah Zomi Council-in lawmthu hrilh

Zomi Council Steering Committee chuan Inrinni khan chief minister Zoramthanga an kawm a, tunhnai mai ni lo, hun rei tak ata tawh Manipur Zofate tana a lo thawh tawh thinna zawng zawngah lawmthu an hrilh.
Zomi Council Steering Committee (ZCSC) hruaituten an ngen angin an kal zel dan tur thurawn hrang hrang Zoramthanga hian a pe a. Mizoramin inthlanpui kan hmachhawn dawn avangin engkimah lo tanpui nghal zat zat a harsa palh thei a, amaherawh chu mipui mamawh an tihsak theih awm apiang chu theihtawpin sawrkarin a ngaihtuah dawn tih a hrilh.
Manipur buai tirh phat atangin an mamawh engkim Mizoram atanga chawlut a, mipui mamawh tluang taka an lak theihna’n Mizoram sawrkarin Tuivai lei a siamthat sak a, Daido lam kawng a chei sak a, Hliappui to Kawlkulh kawng siamthatna a ruahman bawk tih ZCSC hruaitute hian sawiin, ‘Mizoram mipuiin min hmangaih em em a, media hmun tinrengah min tanpui a; Mizoram MP pahnih Pu C Lalrosanga leh Pu K Vanlalvena ten kan tan Parliament-ah theihtawp an chhuah reng bawk a. Kan lawmin kan thla a muang a, lawmthu kan rawn sawi a ni,” tiin chief minister an hmuh chhan an sawi.