ZPM-in loneitu leh thalai dah pawimawh hmasa dawn

ZPM a sawrkar chuan loneitute leh thalaite hamthatna an ngaipawimawh hmasa ber dawn tih working president K Sapdanga chuan a sawi.
Inrinnia Aizawl North-III bial chhungtin tlawhchhuah thlirletna leh lawmthu sawi inkhawmah thu sawiin ZPM working president chuan, an party a sawrkar chuan kuthnathawktute thawhrim thlawn loh dan leh thalai a tam thei ang tan eizawnna nghet siamsak chu a ngaipawimawh hle dawn a, Budget Session hmasa berah hemi pual hian sum serh hran a ni dawn tih a sawi. “Pathian leh mipui zara ZPM-in sawrkarna a chan chuan, kan ngaihpawimawh hmasak ber tur chu kuthnathawktute hamthatna siam leh bana kaih policy hmanga eizawnna ngelnghet a tam thei ang ber thalaite dinpui a ni,” a ti.
MLA-a thlantlin a nih phawt chuan a bialah Local Development Committee (LDC) din a tum thu K. Sapdanga hian a sawi a. LDC hian vengchhung hmasawnna hna thawh tur leh thawh hmasak tur a thlang anga, thawh dan tur a rel anga, thawktu tur a thlang anga, hna a vil zui bawk dawn tih a sawi a ni.