India flag tar beihpui thlak Tum dang angin thawk na lo
India zalenna champha, a vawi 75-na lawmna kalzela in tina India flag zar beihpui ‘Har Ghar Tiranga’ neih chuan Manipur buaina avangin Mizote zingah a thawh dan a rual lo deuh nia sawi a ni. Independence Day 2023 lawmna puala Har Ghar Tiranga beihpui neihah hian August 13-15 chhungin in tinah India flag zar beihpui thlak a ni a. Mizoramah pawh sawrkarin hei hi kalpuiin, India flag engemawzat siamtir niin, hmun hran hranah zawrhchhuah a ni a, sawrkar department office, vantlang hmun, mimal dawr leh hmun lun lai engemawzatah zar a ni.
Heti chung hian Manipur buainaa Zohnahthlakte chunga India sawrkar ngawi thei lutuk chu lungawiloin Zofa engemawzat chuan India flag zar har an tih thu an sawi hlawm a. Thenkhat chuan Manipur Zohnahthlakte avanga India sawrkar chunga lungawiloh lantirna’n national flag hi a ngul chanvea zar an awm bawk.
India flag zar tul ti lo zingah social activist Vanramchhuangi @ Ruatfela Nu chu langsar taka sawichhuak zingah a tel a. Social media lamah kumin Independence Day puala India flag zar loh chhan tur a sawi zingah, Mizoram, Mizo hnam, Mizo sakhua (Christianity) nuaibo vek theihna tura Forest Conservation & Biological Diversity Amendment Act 2023 NDA/BJP-in a siam an pawm vang a ni, tiin, “Mizote hi tribal kan ni a, khawvel puma tribal dangte ang thoin kan hnam nunphung leh ramngaw hi a inzawm tlat. Kan hnam nunphung leh luite leh luilian hi thenhran theih loha inphiarzawm chiat a ni. Pipu chena kan chenna leilung, kan ram, kan hnam, kan sakhua nen hian BJP-in min thenhran tum mah se, kan tlawm lo ang,” a ti.
Hei vang hian Mizo tan mimal inah India flag zar a thiang lo hul hual, tia sawiin, “Tuna kan dinhmun rapthlak taka mimal ina India flag lo zar an awm a nih chuan, mahni ram leh hnam phatsantu (traitor) an ni ang. Thangthar chhuan lo la awm zel turten an ruhro pawh he ram leilunga an zal an remti lo ang,” tiin Vanramchhuangi hian a sawi a. “Mi nuaibo vek tumtu flag leina’n cheng nuai 40 vel khawhral hi khawvela thil inhmeh lo ber a ni ang. Kan ram economy dinhmun nen pawh a inhmeh chuang lo. FC&BD Amendment Act 2023 bakah UCC leh Manipur issue-a Meitei lama tang, Amit Shah (Union Home minister) dawt sawi mekte zawng zawng nen hian India Independence Day-ah chuan India flag aiah puandum zar zawk tur kan ni,” a ti bawk.