Wheelchair-at\hu chungin advocate ni thei

Wheelchair-a thu chungin lehkha a zir a, a hrisel
loh avanga a chawlh a ngaih chang te awm mah se LLB a zir chhuak thei. Tunah chuan advocate a ni ta a, a lawm hle.
Mawimawii tia koh R Vanrammawii a ni a, a naupan laia zeng hri dannaa an chiu sual vangin wheelchair-a a thut a ngai ta. Chuti chung chuan theihtawp chhuahin lehkha a zir a, advocate a ni thei.
Mawimawii hian 2021-ah Mizoram Law College atangin LLB a zo a, hemi kum November-ah hian Gauhati High Court-ah registration tiin a inziaklut – licensing advocate a ni ta.
Advocate a ni tawh a, mahse ‘Bar’ a paltlang a la ngai. Chumi a paltlang hunah Mizoram Bar Association-ah a tel thei tawh ang. Chu chu la paltlang lo mah se advocate a nih avangin affidavit te pawh a siam ve tawh a, court-ah erawh a la ding thei lo.
“Ka lawm a, nun a tinuam khawp mai. Pathian malsawmna liau liau a ni,” tiin LLB te zova advocate a ni thei chu a lawm thu leh Pathian malsawmna a nih thu te a sawi a, “Ka hrisel lohna leh hrisel loh vanga lehkha zir thei lova ka awm lai te ka ngaihtuah a. Tin, ka tan kal vel te a har a, chuti chung chuan ka zir ve thei zel a, ka lawm khawp mai,” a ti.
A kut a chak loh avangin lehkhabu han phawrh leh han ken vel te a harsat thin a, lehkha pawh a ziak thei na a, a ziak chak thei lo. Mahnia chesawn thei lo a nih bakah a kawng leh a hnung te a na thin a, inenkawl a ngai. Chuti chung chuan lehkha hi zir zel a tum a, a theih chin chin zir a tum tawp mai a ni.
Pawl 11 a’n zir a, har a ti em em mai a, a tuina mathematics leh science te la lova arts la a ni a, a zirlai chu hautak a ti. A subject te pawh thlak a rilruk ut ut hman a, mahse thiante pawhin an pass theih laia lo pass theih loh te chu tiin, theihtawp a chhuah zel. Pawl 12 a pass leh ta a, “Ka thiante hi an fel em em a, puih ka ngaih apiangin min pui a, pawl 12 pawh an zara pass ve thei ka ni,” a ti.
Wheelchair-a thu chungin a zir zel a, 2017-ah kha Pachhunga University College atangin BA (Sociology) a pass. “|hian tha tak tak ka nei zel a, mi hi ka chungah an tha em em. Ka luh tawhnaa kan zirtirtute zawng zawng chungah ka lawm a, kan chungah an tha em em vek,” a ti a, “Eng pawh ti ila puitu ka nei zel. Mi hi ka chungah an fel a, Pathian malsawmna ka dawng a ni,” a ti bawk.
BA a pass hian a lawm em em mai a, “Ka graduate ang tih hi ka ring pha bik lo. Awm tawp hi ka duh lo a, lehkhazir hi ka ngaisang bawk a, a theih chin chin zir ve ka duh vangin ka zir ve zel a, Pathian zarah BA chu ka zo a ni ve ta mai a,” a ti.
Awm tawp a duh lo bawk a, LLB a zir zui leh. LLB a zir lai hian taksa lamah harsatna nasa tak a tawk a, a taksain a zawh loh avangin doctor te’n chawl rih turin an ti hial. Hei vang hian kum khat a hloh a, 2020-a zo tur khan 2021-ah a zo ta a ni.
Mahni-a chesawn thei lo a nih avangin a zirna hmunah pawh a thiante’n an pui thin a, an zirtirtute’n theihtawp an chhuahpui thin bawk. A kut a chak tawk lo a, a taksain theihtawp chhuah a zawh loh chang te pawh a awm. Chutiang chung chuan a zir zel a, tunah chuan LLB zirchhuak, advocate a ni tawh.
“I awm dan tur chu Lalpa chungah nghat la, Amah chu ring la, aman a ti vek ang,” (Sam 37:5) tih te, “Mi au la,ka chhang ang che, thil ropui leh inthup i hriat ngai loh chu ka entir ang che” (Jeremia 33:3) tih te leh Bible chang dang dang a ngaina a, Pathiana innghat tawp mi a ni.