Kuthnathawkte hmasawnna tur thlen

Agriculture minister C Lalrinsanga chuan kuthnathawktute hmasawn zel dan tur sawipuiin kar kalta khan Delhi-ah sawrkar laipui hotute a kawm.
Agriculture changtu union minister of state Kailash Choudhury chu a chenna inah hmu in, state mamawh a sawipui. Mizorama KVK thar dinna turah pawh EFC report engkim peihfel a nih tawh thu leh cabinet pawmpuina nghah mek a ni tih a lo hrilh a ni.
Hemi chungchangah vek hian Mizoram minister hian ICAR Agriculture Extension DDG Dr AK Singh hmu nghalin, cabinet pawmpuina an hmuh veleh a ranglama bawhzui a nih tur thu a lo hrilh.
Union MoS bakah hian Agriculture secretary Manoj Ahuja bakah joint secretary te nen an inkawm a. ATMA (Agricultural Technology Management Agency) in harsatna an tawh mek chu sawi a ni a. Hnathawkte hlawh pawh sanction nghal a nih thu sawi a ni.
Heng bakah hian Union Power secretary Pankaj Agarwal a hmu a. Nizung chakna (solar power) hmanga khawpui tih hmasawnna sawiho niin, Ministry of New and Renewable Energy hnuaia PM Kusum – solar water pump khawl hmanga kuthnathawktuten awlsam zawka tui an lak theihna tur scheme chungchanga harsatna awmte a hrilh. Union secretary hian a ranglama chinfel a nih tur thu leh kuthnathawktuten a ranglama solar water pump an neih theihna tura ministry lamin tihfel ngai tlem an la neihte chu a ranglama tifel thuai turin minister C Lalrinsanga hian a ngen bawk.