Ramri atanga ruihhlo do…
Ruihhlo hi nun titawitu a nih bakah, chhungkua, khawtlang, ram leh hnam hmelma a ni, kan ti a; a thatlohzia hahipin kan sawi a, kan sawi nasa takzet tawh.
Chutih rual chiah chuan a ruihhlo bera pawh kan state chhungah hian kan man nasa takzet tawh bawk. Tunhnai thla hnih khat chhung lek hian heroin leh ruihhlo dang manchhuah a tam thin hle a. |um khatah Kg 2/3 man a nih thu hi thuthar lamah ni tin deuhthaw hriat tur a awm ta. Sawrkar pawhin ruihhlo donaah hian tha a chhuah nasa a, Task Force on Ruihhlo do pawh state level leh district level awmin, hei bakah hian NGO lian ber YMA pawhin englai pawhin nasa takin a do a, Kohhran pawhin a do a, pawl hrang hrang pawhin an do; Ruihhlo hi kan do chur chur mai a ni.
Ruihhlo heti taka do a tulna chhan chu, ramri kanin ram dang atangin tam tak eng lai pawha a lo luh reng vang a ni. Ruihhlo hian min chiah hneh takzet tawh a, Mizoram hi India ram state dang leh khawvel ram hrang hranga thawn darh tur luhkhawmna hmunpui (drugs corridor) a ni ti ila, a sual hran lovang.
Mizorama ruihhlo a tam chhan hi kan hre vek tawh a, ramri paltlanga kan state chhunga a lo luh nasat vang a ni. Chuti a nih chuan, a lo luhna Khan Pui ber chu engatinge kan ven hneh tak loh? Mizoram chhunga a lo luh hnua manchhuah lo tum chauh kan nih chuan kan tlai der tawh a. naupang leh thalaite hnenah ruihhlo thatlohzia sawiin hrilh eng ang mah ila, ruihhloin min hual vel khup reng si chuan kan indang seng lo chu a ni ber tawh a. Tunah phei chuan kum tlinglo zingah ruihhlo ngai an pung, tiin zirbingmi ten an finfiah tawh lehnghal.
State chhunga a lo luh fel vek tawh hnua lo mnan chhuah tuma Ruihhlo hi kan do a nih chuan kan do hneh ngai lovang. Reh hmak khawpa do chu thil theih loh a ni ang a; mahse ramri paltlanga lo lut tur hi chu kan lo dang thei chiang a ni; kan tum phawt chuan.
Chuvangin, ram chhunga lo lut tur lo dang tur hian ram chhunga ruihhlo donaa thapui kan chhuah let hnih vela nasa hian ramri-ah tan la ta ila, min tichhetu tia kan sawi kan sawi hi kan tichhe let ve thei ngei ang le.