Real defender Militao inhliam ve leh

Karliamta Ninganiah goalkeeper Thibaut Courtois chu khup hliam buaithlak chiin a nangching a, tun season hun rei zawk a chawl dawn tih nemngheh a nih hnu Inrinni league bul an tannaa sihnih faia Athletic Bilbao an hneh tumin Real Madrid defender Eder Militao pawh an goal-veng inhliam dan ang bawk khup hliam (anterior cruciate ligament) avangin a tlusawp ve leh a, thla tamtak a chawlh ve leh a ngai dawn.
Brazil tana game 30 khel tling tawh Militao hi kum 25 mi chauh la niin, a vanglai a thleng chho tan chiah tihah hliam dam har chiin a tlakbuak ta a ni.
Bilbao game-ah hian rei a tlan hman lo tihah Brazilian hian a khup veilam a tina a, club thuchhuah chuan ni reilotea zai a ngaih tur thu an nemnghet.
Militao a inhliam ve leh tak avangin manager Carlo Ancelotti chuan tun dinhmunah centre-back dam tha pangngai pathum chiah chhawr tur a nei ta rih a, chu’ng mite chu – David Alaba, Antonio Rudiger leh Nacho-te an ni.
League season bul an tanna inkhelah khan kumin nipui laia Borussia Dortmund atanga an sengluh England midfielder Jude Bellingham chuan Athletic Bilbao lakah Real tana a goal hmasaber a thun.