Eiruk loh intiam ringawt lo, a taka tihlawhtlingtu an ngai – MPCC treasurer

Eiruk loh intiam ringawt lo, fiahna a thlena tihlawhtling leh ngai lo hruaitu ni loin, mi dik leh rinawm tih hriat sa lama tang turin mipui a sawm tih Congress treasurer Dr Lalmalsawma Nghaka chuan a sawi.
Thawhlehni khan Aizawl South-II biala an party intuaitharna hun a hmanpuinaah MPCC treasurer chuan kumin kumtawp lamah inthlanpui neih turah Mizoram mipuiin kan ram kaihruai atana tha ber tih ngun taka buk a ngai tih sawiin, “Kan ramah hlemhletna laka fihlim hruaitu kan mamawh hmasa ber a. Kan ram min kaihruai turin thusawi thiam ringawt ni lo, a taka che chhuaka mahni insawi anga nung thin hruaitu rintlak kan mamawh tawh hle a ni,” a ti.
Party thenkhatin, ‘Ka eiru loang’ tih thu tiam mah se, sawi ringawt a tawk loa, a taka nunpui a ngai tih a sawi. “Thu tam tak intiam a, fiahna a rawn inherchhuah huna tihlawhtling leh ngai lo hruaitu neih ai chuan, mi dik leh mi rinawm a ni tih kan hriat sa, Pu Lalsawta lamah Mizoram mipui tang turin ka sawm a ni,” a ti bawk.
Ram hruai tura party tinin chief ministerial candidate an neih Pu Lalsawta, Pu Zoramthanga leh Pu Lalduhoma te zingah mipuiin an buk dawn a, eirukna laka fihlim leh mi dik thlan chhuah a ngai tih Dr Lalmalsawma hian a sawi. “CM candidate zingah Pu Lalsawta hi rorelna chang tawh, term hnih cabinet minister ni tawh, eirukna laka fihlim ngam a ni a. Sawi tawh anga awm thin a ni tih kan hre bawk. A ni kaihhruaina hnuaiah Mizoram hian hmasawnna hmel thar kan hmu ngei ang tih a chiang hle,” a ti.