South Korea, Japan leh US te inhmukhawm

South Korea president chuan North Korea nuclear ralthuam neih tumna kal mek zelah US leh Japan te nena thawhhona thuk zawk neih a duh thu a sawi a. Camp David a US leh Japanese leader te nena summit an neih turah ‘ram pathum thawhhona mellung pawimawh’ siam a nih theih a beisei thu a sawi.
He inhmuhkhawmna tur hi ram pathum tena thlurbing neia inhmuhkhawm an neih hmasak ber tur a ni a, a hma zawng chuan international meeting karawlah an nei mai thin. A hranpa ngata inhmuhkhawmna an huaihawt avang hian North Korea in nuclear ralthuam a neihpun zel leh Washington leh Beijing inbakkaihna kal zel chu an ngaithutak zual hle tihna anga ngaih a ni.
Zirtawpni hian US presidential retreat-na hmun Maryland ah an nei dawn a. President Joe Biden, South Korean President Yoon Suk Yeol leh Japanese Prime Minister Fumio Kishida te chuan ballistic missile defense leh technology development lamah thawhhona thuthlung an siam dawn tia sawi a ni a.
He inhmuhkhawmnaah hian ram pathum tena Korean Peninsula leh Indo-Pacific region ah te remna leh muanna a awm theih nan mellung pawimawh an siam ang tiin Yoon chuan Seoul a television kaltlanga thusawina a neihah a sawi a ni.
Television kaltlanga a thusawi hi Japan in kum 35 a awpbeh hnua kum 1945 a Korea zalen cham 78 na niin, he hunah hian South Korean president kalta te chuan Liberation Day chu an ram an awp laia Japan in tihsual a neiha ngaihdam dilna sawi tura tur nan an hmang thin a ni. Kuminah erawh conservative Yoon chuan tun hmaa inbakkaihna te chu dahtha in Seoul-Washington-Tokyo thawhhona tha chu tuna mamawh a ni a ti a.
Yoon chuan US kaihhruaia Japan enkawl UN command seven rear base chu North Korea in South Korea a runna daltu pui ber an ni a ti a. North Korea in South a run a nih chuan UN Command a inrawlh nghal dawn a, Japan a hmun an neih atangin lei, tuipui leh boruak atanga beihletna an nei a ni a ti bawk.
“Economy leh security lama kan thawhdun angin South Korea leh Japan chuan khawvel huap pawhin remna leh muanna a awm theih nan tha an thawh thei a ni” tiin Yoon chuan a sawi bawk.
Hei bakah hian Yoon chuan Korean Peninsula leh helai region pumah Seoul-Washington-Tokyo security cooperation chu a pawimawh a ni tiin a sawi bawk a.
“North Korea nuclear leh missile dang turin Republic of Korea, United States leh Japan te chuan thawhhona thuk tak neiin North Korean nuclear weapon leh missile data te chu an inhrilh tawn reng a ngai a ni” tiin Yoon chuan a sawi bawk.
Nikum November thla khan Cambodia-a regional conference neihah Yoon, Biden leh Kishida te hian inhmuhna nei tawhin North Korea missile warning data inhrilh tawn an lo remti tawh a. June thla khan ram tin defense chief te chuan kumin kum tawp hmaa data-sharing mechanism siam fel ni se an lo ti tawh bawk.
Camp David summit neih tur hian North Korea chu a tihthinur viau rin a ni thung a, North Korea chuan US chu South Korea leh Japan te sipai chakna lama an theihna tihpunsak tumah a puh bawk a. North Korea chuan US kaihhruaia Korean Peninsula a military drill neih thin te chu amah run nana inpuahchahna angah ngai rengin a duh lo takzet bawk.
Hetihlai hian China pawhin Camp David a inhmuhkhawmna neih tur chu a duh lo hle bawk a. China in a duhlohna hi Foreign Ministry thupuangtu Wang Wenbin chuan a sawi lang nghal bawk.
South Korea erawh chuan US nena inlaichinna neih ngheh zual zel a duh leh tumna chiang taka sawiin mahse chu chuan a sumdawnpui ram lian ber China nena inzawmna an neih a tibuai lovang tiin a sawi thung.
North Korea nuclear program avanga ngaihthat lohna hi tun hnaiah North in langsar taka nuclear weapons a hman mai theih thu a sawi leh nikum kum tir atang tawha missile tum 100 chuang a enchhin tawh avangin a nasa zual a ni. North Korea ralthuam enchhin te hi nuclear ralthuam keng tel thei te ni hlawmin South Korea leh Japan te chu duhthusama kah theihna niin US mainland meuh pawh kap pha tia sawi a ni a. South Korea leh Japan ah hian US chuan sipai 80,000 vel lai a dah mek a ni.
North Korea missile test chhanlet nan hian United States leh South Korea te pawhin military drills an nei chamchi bawk a, a changin Japan pawhin a zawm ve bawk.
South Korea, US leh Japan te hian kum 1994 hnua trilateral meeting tum 12 an nei tawh a, mahse, heng zawng zawng hi international conference neih pengah hlir a ni a, tun hi a hranpa ngata hun bituk siama inhmuhkhawm an neih tumkhatna tur a ni thung.