Kuhva chingtute’n kawl eng beisei
Myanmar atanga kuhva phurh luh a nih hnua
harsatna tawktu Hachhek tlang dunga kuhva chingtute’n kawl a eng dawnin an hria a, kum hmasa lama an harsatna a kiam an beisei mek.
Hachhek Bial Kuhva Chingtu Pawl hruaitute chuan an kuhva man (rate) a tha leh dawn niin an hria a, kum hmasa aia an hlawh that an beisei.
Kuhva hi November velah an lo tan a, a kum leh April te an thleng thin. A leitu ‘mazon’ te’n an lo hauh lawk a, inremna an lo ziak lawk thin. Kum tawp lama lawh tan turah hian mazon-te nen hian indawr felin an inrem tawh a, a man pawh a to leh dawn.
An pawl hruaitute sawi danin, an lawh hnuhnuh ber (2022 November atanga 2023 April vel) khan an pawl member-te sum hlawh hi cheng nuai 3235 vel angin an chhut a, mazon-te nena tuna an inrem dan chuan an lawh leh hunah cheng nuai 7800 chuang hlawh theih an inbeisei.
Kuhva chingtute leh mazon-te inbiaknaa a lan danin, a hlawh hnem ber tur chuan cheng nuai 35 a hlawh thei dawn.
Nikum lamah Myanmar atanga kuhva phurh luh, Assam-a lakluh a awm avangin mazon-te hian kuhva hi an lei tha ngam lo a, mazon-te hi Hailakandi district-a mite niin, kum hmasa khan Myanmar kuhva, Mizoram kaltlanga Hailakandi district-a phurhluh vang hian Hachhek bialah kuhva hauh turin an lut ngam lo reng. Hei hian a man pawh a tichhia a ni. Kuhva chingtu pawl hruaitute chuan Myanmar atanga kuhva phurh luhte lo dang turin an ‘duty’ a, hei vang hian mazon-te thla a muang a, kuminah kuhva hauhva indawr turin a hunah an kal ngam; hma takin an indawr fel thei reng bawk tih an sawi.
“A rate a pung a, an ngaih a ngam a, man to pangngaia lei turin agreement an ziak ngam a. Tin, kuhva rah hi a pung tura ngaih a ni bawk a,” an hruaitu pakhat chuan a ti.
An pawl hian Tuidam leh Kawrtethawveng inkarah check post an siam a, hetah hian Myanmar atanga kuhva lut lo dang turin darkar 24 an ‘duty’ thin. Zamuang-a police check post-ah police-te bulah an ‘duty’ ve thin bawk. Hengah hian pawl sum an seng thin.
An hruaitute chuan hetia theihtawp an chhuah avang hian mazon-te an lawm a, Myanmar atanga kuhva lakluhin a tibuai tawh dawn lo nia an hriat avangin an ngaih a ngam tih an sawi.