Sialhawkah lakhuihthei sawngbawlna siam dawn

Sustainable Development Goals pakuana – ‘Fostering Industry, Innovation, Infrastructure and Livelihood Oppurtunities’ tih hlawhtlinna atan Sialhawk, Lungleng and Seling tana lakhuihthei sawngbawlna hmun siam tur chu Ningani khan deputy chief minister Tawnluia chuan Sialhawkah a lungphum a phum.
Pineapple Processing Plant chu Sialhawk mipui taimakna leh thahnemngaihna in a hrinchhuah a ni tih deputy chief minister hian a sawi a. Mizoram sawrkar chuan a flagship program SEDP kaltlangin mitin huapzo hmasawnna tluantling a kalpui mek zel tih a sawi. Sialhawk Pineapple Processing Plant bakah Tualte tomato chingtu chhungkaw 250 mamawh pipe leh silpauline pek vek an nih thu te, Tomato Processing Plant sak mek a nih thu te; Chawngtlai leh Khawhaia sapthei chingtu chhungkaw za vel ve ve tan thirzai quintal thum theuh pek an nih tawh thu te; Riangtlei, Vangtlang leh Tualtea sial vulhtute hmalakna pawh sawrkarin a puihbawm thu te a sawi bawk.
Khawvel sawrkar zawng zawngin ‘mitin huapzo hmasawnna tluantling – Sustainable Development Goals’ an buaipui thu sawiin, Mizoram sawrkar pawhin theihtawp a chhuah a, nodal agency Planning department kaihhruaiin society- Mizoram Science, Technology & Innovation Council (MISTIC) chuan khaw hrang hrang tlawhkualin an mamawh an zirchiang a. MISTIC zirchian hnu ah detailed project report siamin North Eastern Council-in an pawm sak hnuah sanction engkim peihfel a ni ta tih Tawnlui hian a sawi a ni.
Sialhawk lakhuihthei za zela 30 tawihral thin chu processing plant hian a tih ziaawm theih a beisei tih deputy chief minister hian a sawi a. Kuthnathawktute tan lakhuihthei hralhna bakah Sialhawk leh a chhehvel khaw mipui tan eizawnna thar – khawl enkawl, lakhuihthei phurh khawm, lei leh hralh bakah industry thil dang neuh neuhah eizawnna tha zawk a siam a beisei tih a sawi bawk.
MISTIC hotute sawi danin, hlawk zawka lakhuihthei hralh a nih theihna’n sawngbawlna hmun din a ni dawn a; juice, jam leh thildang siamna tur niin, state pawn thlenga thawn chhuah tlak siam tum a ni. Processing plant atan hian cheng nuai 199 ruahman a ni.
Sialhawk Pineapple Growers Society report danin, an khua hian nikum fur chhung khan lakhuihthei quintal 14000 an thar a, thal laiin fur laia an thar hmun ngaa thena hmun khat an thar thung. Sialhawk hian Mizorama lakhuihthei tharchhuah zaa 64 an thawh a. Khaw thenawm – Tlangpui, Tlangmawi, Chalrang, New Chalrang, Lungtan, Khawhai, Vangtlang ho nena an thar belhkhawm hi Mizoram lakhuihthei thar zaa 97 a tling phak a ni.