Tuin nge Aizawl kha lo bomb?

1966 March ni 5-ah India sipaite’n jet fighter leh
bomb hmangin Aizawl an bei a, thlawhna atanga silai hmet puaktu leh bomb thlaktu chungchangah tunlaiin inhnial an awm mek.
BJP-in Aizawl bomb-tu chu Rajesh Pilot an ti a, Rajesh Pilot-a fapa Sachin Pilot-a’n a ni lo a ti ve thung. Rajasthan chief minister-in Rajesh Pilot a ni lo a ti ve bawk.
Kar hmasa khan Parliament-ah Congress party-in Manipur buai vangin sorkar paih an tum a, sorkar rintawk lohna an pu lut. Hemi tum hian prime minister Narendra Modi-a’n 1966-a thil thleng hi a sawi chhuak a, “Congress-in an Air Force hmangin Mizoram mipui an bei,” a ti.
Hemi chungchang hian India ram media a luah zui a, BJP IT Cell hotupa Amit Malviya-a’n bomb thlaktu chu Congress hruaitu thin, minister hlui Rajesh Pilot leh Suresh Kalmadi te an ni tiin a sawi. “Rajesh Pilot leh Suresh Kalmadi te hi March ni 5, 1966-a Mizoram khawpui Aizawl bomb-tu Indian Air Force thlawhnaah khan an chuang. A hnuah an pahnih hi Congress MP an ni a, minister an ni zui bawk. Indira Gandhi khan hmarchhaka khua leh tuite ngei thlawhna hmanga beitute kha politics lamah a chawisawng,” tiin a sawi.
Rajesh Pilot-a fapa Sachin Pilot, sorkar laipuia minister hlui, Rajasthan deputy chief minister ni bawkin a rawn chhang a, Aizawl bomb-tu kha a pa a ni lo tia sawiin, a pa kha Indian Air Force pilot a ni thin ngei a, 1971-a Pakistan nena indonaah bomb a thlak, Mizoramah ni lovin tiin a sawi. A pa hi 1966 October ni 29-ah a commission chauh tiin a sawi.
Nilaini khan Rajasthan chief minister Ashok Gehlot pawh a tawng chhuak a, BJP-in Rajesh Pilot an puhna chu ram pumin an dem tur a ni tiin a sawi.
Mizoram bomb-tu chungchangah Rajesh Pilot leh Suresh Kalmadi te hming hi a hma pawhin a lo ri tawh a, 2010 April ni 10 Indian Express chhuakah khan an editor-in-chief Shekhar Gupta chuan ‘The buck starts here’ tih thupui hmangin 1966-a bomb hmanga Aizawl beih thu hi ziakin, “A bomb-tu pilot-te zinga kan han hriat mai theih tur mi pahnihte chu: Rajest Pilot leh Suresh Kalmadi te an ni,” a ti.
Zalenna sual lai chanchin chhuitu historian, Prof JV Hluna chuan Aizawl bomb-tu hi hriat a la nih loh thu a sawi a, kum 10 chuang kal taa Sekhar Gupta thuziak kha tuman an chhan loh laiin tunah BJP hruaitu pakhat sawi chu Congress-in an chhang tih sawiin, BJP pawh hian an duh chuan chiang takin an hre thei a, chu ai chuan Congress chhaih nana hman an duh a ang tiin a sawi.
Thlawhnaa chuang nia sawi mi pahnih chu hemi chungchang hriatchian tumtu mi pakhatin a kawm tawh thu a sawi a, a kawmtu hi a thil hriat a sawi hmain vanduaithlak takin a boral a, thu chiang hriat a ni ta chuang lo tih a sawi.