Kawng chhia siam phutin Mamitah total bandh nei

Mamit district-a an eizawnna kawngpui leh lei tha tawk lo siamthat phutin truck leh tipper neitu leh khalhtute chuan tiamchin awm loin August 21 zing dar 6.00 atang khan total bandh an nei a. District kawng pawimawh ber National Highway 108 leh district chhunga kawng pawimawh tak tak dang dan a ni.
Mamit Truck Owner Association leh Mamit Truck and Tipper Assocition hian road block/ total bandh an neih chhan an sawi danin, Darlak leh Bawngva inkar Terei lei (Bailey bridge) chu lirthei lian full load-in a zawh theih tura siamthat, National Highway 44A Darlak to Tuidam siamthat, Darlak leh Bawngva inkar Terei luia RCC bridge thawh mek chak zawka kalpui, National Highway Tuidam Existing Road km. 105 to 111 (Tuidam kawng hlui km.6) kumin June leh July a siam tawhah lirthei lian kal phalsak leh tawh turin, Mamit to Bairabi road siamthat, Mamit leh Dapchhuah inkar leitla thenfaia siamthat te a ni.
Mamit atanga thudawn danin, Zamuang Zero Point, NH 108 Mamit pengah leh Dapchhuah bul W. Phaileng peng bakah Sericulture farm Mamit bulah total bandh huaihawttute hian duty siamin kawng an dang a; Mamit achin thlanglamah maxi cab service a awmloa, lirthei tangkhang engemawzat a awm a ni.
Hetihlai hian Mizoram sawrkar chuan Mamit district-a truck leh tipper hmanga eizawngtuten kawng leh lei chhia siam phuta total bandh an neih chungchangah sawrkar dinhmun leh hmalakna a sawifiah a ni. (PWD) Public Works Department chuan Mamit Truck Owners’ Association-in NH-44A bandh an neih chungchangah sawrkar dinhmun leh hmalakna a sawi.
NH-44A highway-a harsatna hrang hrang thleng thin Mamit Truck Owners Association-in a sawi chu Mizoram PWD chuan pawi a ti a. He highway siamtu contractor Gayatri Project Ltd. chuan sum harsatna an tawh avangin duh angin hna an thawk chhunzawm hleithei loa. He kawng chunga thuneitu Ministry of Road Transport & Highways (MoRTH) in an contract titawp turin tunhnaiah Mizoram PWD a hriattir a. An contract titawpa hna balance work re-tender tura hma lak mek a ni tih a sawi.
Mamit Truck Owners Association-in harsatna hrang hrang an sawia thil awm dan chu sawifiahin, Darlak leh Bawngva inkara Bailey bridge hi a hlui tawh a, lirthei lian full load tan zawh ngam a nih loh avangin load restriction siamin a zawh tawk, metric tonne 12 chin tan zawh phal a ni. He lei hi siamtha tura hmalak mek a ni a. Bailey bridge siamtha tur hian lei awm sa hi nawr chhuaha remkhawm that leh tur a ni a. Hei vang hian lei siamthat chhunga lirthei tlanna tur kawng diversion neih a ngai a. Thal lai lui tui tlem laia lirtheiin lui a daikai thinna lai hi a dai kai theih leh hun fur zawha Bailey bridge siamtha tur hian hma lak a ni.
National Highway Darlak to Tuidam siamthat tuna contract hna kal lai hi a hmalama tarlan contractor (Gayatri) te hna niin, thawk chak thei tur contractor dang thlang tura re-tender tuma hma lak mek a ni a. Tun dinhmunah a chhe zual siamtha turin inruahman a ni a, hma lak tan thuai a ni dawn tih a sawi.
Darlak leh Bawngva inkar Teirei luia RCC lei hi NH-44A contractor tarlan tak bawk hnuaia thawh a ni a. Tarlan tawh angin, tuna contract hna kal lai hi tihtawp a, a hna hi a thawk chak thei tur contractor dang thlang tura re-tender tum mek a ni, a ti.
Tuidam existing road hi kawng chhe zual lai hmun hrang hrangah concrete pavement-in siamthat a ni a. Concrete hi curing period a la nih avangin kawng a tlo zawk theihnan lirthei lian chu zawh tir rih loh a ni a. Amaherawhchu, mamawhna a nasat em avangin August 21 atang hian lirthei chitin tan he kawng hi hawn nise, tiin Mamit SP hnenah thlen a ni tih a sawi.
Mamit to Bairabi road hi tunhnaia national highway-a puan thar a ni a. A kawng chhuat siamthatnan ministry (MoRTH) in annual plan-ah cheng vaibelchhe 45 a ruahman a, estimate pawh thehluh tawh a ni. Sanction a nih ve leh siamthat tum a ni. Tun dinhmuna kawng chhe zual hnawh tha turin theih ang anga hma lak a ni.
Dapchhuah to West Phaileng kawng hi km.18 a thui hi MPWD enkawl a ni loa, Border Roads Organisation enkawl niin MPWD-in a chhiat a thatah thu a nei lo tih a sawi a ni.