Georgia-ah Trump-an inpek tum
Donald Trump chuan Georgia court ah ningani hian election a dan kalha inrawlh tia thubuai siamsak chungchangah inlanin a inpek tur thu a sawi.
Atlanta-a judge Trump case khawihtu chuan bail nan $200,000 dahkham a ngaihthu a sawi zui bawk a. Trump chu withness te hneh tum emaw a hmalakna a nei lo a nih chuan a zalen zui nghal tur thu a sawi zui bawk.
Trump hi thubuai 13 siamsak niin chung zingah chuan racketeering te leh false statement siamah te puh a ni tel bawk.
A hnuah Trump chuan a truth Social hmangin, “In ring thei em? Atlanta, Georgia-ah Ningani ah ka kal ang a, Radical left District Attorney, Fani Willis-an min man ang,” a ti zui bawk a.
“A campaign char char a, ala campaign zel a, sum a tuak mek a, witch hunt dik tak a ni. Misual Joe Biden’s DOJ [Department of Justice] te nena thawkho vek an ni” tiin a sawi bawk.
Amah bail theih nana tihmakmawh siamah US a thlawhchhuahsan palh hlauhna tih a tel thu sawiin, “Ka thlawhna TRUMP tih inziak chung hian ram pawn ka chhuahsan thei dawn em ni. A teuh lo mai, commercial airplane a thlawh pawh a tha zawk ang a, tumahin min hre lo zawk ang” tiin a sawi zui bawk.
Trump inpek tum avang hian county jail area ah te chuan lockdown kalpui nghal a nih thu Fulton Country Sheriff office chuana sawi a. Barricade te siamin tunkara Trump inpek hmain court chhehvelah pawh venhimna khauh zawka kalpui a ni bawk a.
Trump hi a co-defendant te nen Georgia electorate te duh dan tichingpena chetlak tumah puh an ni a.Trump hian inthlan lai khan georgia Republican Secretary of State Brad Raffensperger chu ballot count laia ‘11,780 vote’ hmu turin a ti tia puh a ni.
Trump hi US president ni tawh zinga thubuai siamsak hmasak ber niin hei bakah hian criminal case dang pathum a nei mek bawk.
Trump erawh chuan engmah tihsual a neih loh thu sawi char char thungin amah puhnate chu politics thila amah tihchhiat tumna vek tiin a sawi ve thung a.
Trump hi Democratic candidate te kum 2024 presidential election a khing tura beiseiawm ber niin Republican lama hmahruai mek a ni.