Bike outreach leh mini lab vailiam

Mizoram State AIDS Control Society hnuaia New Bike Outreach kaltlanga district zawng zawng tuamchhuak tur bike 11 leh AYUSH Health & Wellness Centre 38-a hman tur mini laboratory services bungrua sem turte chu Thawhlehni zing khan Health & Family Welfare minister Dr R Lalthangliana’n Aizawl atangin a vailiam.
MSACS Bike Outreach kalpuina’n NACO-in bike a tum sak bakah PATH-in thawktute rawihna tur a tum sak avangin lawmthu a sawi a. Thingtlang kilkhawr thlenga service thei turin awmze thui tak a neih ngei a beisei tih a sawi a ni. AYUSH Health & Wellness Centre-te hnena laboratory hmanrua pek chuan hmasawnna a thlen ngei a beisei tih a sawi bawk.
MSACS New Bike Outreach kaltlang hian hmun kilkhawr ber thleng pha HIV test, councelling, damdawi pek, HIV hri danna sem leh tul dangte thawh a ni dawn a. Heng hna hi laboratory technician-ten an thawk dawn a ni. Heng bakah hian mamawhna hmun leh high risk group miharsate an pan chilh thei bawk ang. Ayush doctor thutchilh Health & Wellness Centre 38, hmun kilkhawr tak taka awmte hman tangkai theih tur laboratory bungrua, thisen test leh a dangte tih theihna tur hmanrua hi truck 16 hmanga sem chhuah a ni.
National AIDS Control Program phase 5 duhdan anga HIV kai zaa 80-a pawhhniam a nih theihna’n HIV kai, mahni dinhmun la hre loten an hriat ngei na’n HIV test hi a hma aia nasa zawka kalpui a ngai tih Health department hotute chuan an sawi a. MSACS hnuaiah ICTC leh Mobile ICTC (HIV test-na) district tinah awm mah se, khaw kilkhawr zawk leh heng test-na hmun pan harsa ti an la tam avangin, bike outreach hi NACO ah thlen niin, pawm a ni a. HIV kaiten an dinhmun an hriat hma chuan enkawlna tha (ART) an ei hma anga, hei hian an hriselna bakah midang kaichhawn loh kawngah thui takin kawng ro a su a ni.
HIV kai sam tura ngaih, high risk group (HRG) zingah thisen test tha duh lo, chhuanlam siam avanga ICTC a hruai thlen theih loh bakah awmna hmun hlat avanga ICTC thlen harsate tan bike outreach hi buatsaih a ni a. HRG ni lo, thisen test duh, a test-na hmun pan harsate tan pawh ruahman a nih bakah HIV hri darh zel tur venna hmanruate a mamawh tan an sem anga, ART damdawi, hmun hla zawka awmte tan a remchan dan anga sem tum a ni. HIV positive, ART Centre-a inentir thei lo ten ART an lak tan theihna’n bike outreach hian hma a la tel dawn a. ART ei tha, hmun hla zawka awm, viral load test harsaten a hun taka an test theih nan hma lak tum a ni bawk.
Heng hmuna Ayush doctor dahten hun khawhral loa natna an hriatchhuah hma lehzual na’n laboratory hmanrua, thisen, zun leh test tul an tih theihna’n Health & Wellness Centre hi thuam mek niin, bungraw thawnchhuahte pawh hetiang atana hman turte an ni.