Rel kawng tur chim chhui turin Railway minister ngen

Sairang Kurung luia rel kawng lei dawh mek chim chungchangah BJP Mizoram State president Vanlalhmuaka chuan Union Minister of Railways Ashwini Vaishnaw chu chhiatna thlen dan chhuichiang turin a ngen.
Railways lei dawh mek chim thu hriat a nih ve leh party hruaitu thenkhatte BJP State president hian a hmun an tlawh a. A thil hmuh dan hi Union Railways minister Ashwini Vaishnaw chu phone-a hrilh nghalin, lei dawh hna kal meka chetsualna thleng chu chhuichian a ngaih thu leh Railway minister chu chhiatna thlenna hmun a ranglama tlawh turin a ngen. Nilaini zan khan Union minister hian BJP Mizoram president hi be letin, chhiat tawhna pawi a tih thu leh, a ranglama an chhiat tawh chhan chhui a nih tur thu te, a rang thei ang bera chhiat tawhna hmun tlawh a tum thu a hrilh a, State president-in a hmuna a zuk tlawh avangin lawmthu a hrilh bawk.
He lei dawh chim avang hian Railways hnathawh kal mek chu ti khawtlai phah loa hna chhunzawm a tul thu leh, chhiat tawhna avanga thihna tawk chhungte leh hliam tuarte ngaihsak kawngah rang taka hma la turin Vanlalhmuaka hian Union minister hi a ngen a ni.