Mizo film thar ‘The Ghost Hunter’ Aug 25-ah tlangzarh dawn

Mizo film thar ‘Kaphranga Fatlum Awitea – The Ghost Hunter’ tih chu August ni 25 zan hian Saikuti Hall, Lunglei-ah tlangzarh a ni dawn ta a, an tlangzarh rual hian Lersia Play-ah man chawia en theih turin an dah nghal ang.
He film hi Mizo film chhuak hmasa hriat hlawh tak tak ‘Mission,’ ‘House No.109’ leh ‘Cabin’ tih te lo buaipui tawh zinga mi Johan Lalhmunmawia (JC Motion Pictures) siam niin, Mizo film hriathlawh tak ‘Ka U Liana’ tih film-a a changtunu Esther Hadasi Ralte leh ‘Where’ tih film atanga kan hmelhriat tawh Elvis Ngurchungnunga bakah YouTube lama lawm hlawh tak Lalrozuala Chawngthu te channa a ni a, Mizo mipuiin kan hriat lar tawh sa Mastea, RSP leh K Vanlalawmpuia (Zabilha) te pawh an inlan e.
He film hi a kalphung a danglam deuh dawn a, film hlauhawm lam (horror) a ni chungin, a hlimawm (comedy) pawh a tel dawn tho a, chutiang karah chuan Kohhran leh ram kalphung pawimawh tak tak te pawh tarlan tel niin film siamtute chuan an sawi a, he film buatsaih nan hian thla 10 vel hun an hmang a ni.