Lei chim chhui dawn Ruang hmu kim tawh

Sairang Zero Point bula rel kawng dawh mek chimin a chim hnan hnathawktute ruang chu hmuh kim a ni ta a, he lei dawh chim chhan chhuichiang turin sawrkar laipuia Ministry of Railways chuan High Level Committee a din.
Ministry of Railways hian Research Design and Standards Organisation (RDSO) principal executive director-II (Bridge) BP Awasthi kaihhruaina hnuaiah lei chim chhan chhui turin High Level Committee hi a din a. IIT Delhi Structural Engineering department-a associate dean Dr Dipit Ranjan Sahoo chu member secretary atan ruatin, Indian Railway Institute of Civil Engineering-a thawk mek Prof Sharad Kumar Agarwal leh Northeast Frontier Railways-a chief bridge engineer Sandeep Sharma-te chu member atan ruat an ni.
Rel kawng chim chhan hi thla khat chhunga report peihfel hman tura tih niin, a tul dang azirin anmahni puitu tur an ruat belh thei dawn a ni.
Hetihlai hian Sairang rel kawng chim avanga nunna chante ruang zawn hna ngawrh taka thawh a nih hnuin, Zirtawpni chawhnu dar 12.45 vel khan ruang pakhat hmuh leh a ni a. Heti hian rel kawng chim avanga nunna chan mi 23 ruang chu lakchhuah kim a ni a, hliam tura pathumte dinhmun ngaihtuahawm an awm rih lo nia sawi a ni.