MR nihna dan loa hmangtute jail tan leh sum chawiin hrem

Ruihna atana hman chi khuh damdawi dan loa kawl leh hralh tumnaa inhnamhnawih, medical representative (MR) an thurualpuite chu court-in thiam loh chantirin jail tang tur leh sumfai chawi turin a hrem.
Kumin February 14 chawhnu dar 1.04 khan Lunglei Venglaiah Excise & Narcotics Deptment chuan Lalramdina, Lunglei Venglai scooter khalh lai atangin ruihna’na hman theih khuh damdawi bur 320 a man a. A hnu ah damdawi neitu Zothanpuia, Chanmari-I Lunglei man leh niin, NDPS Act 1985 ziahluh a ni. Zothanpuia hi Lianhna Drugs Store, Chanmari Veng Lunglei hnuaia medical representative a ni a. MR licence nei a nihna hmang dik loin, ruihhlo hi a khawih a, Lalramdina chu thurualpui atan a sawm a ni.
An chungchang hi Special Court (NDPS Act) Lunglei judge Rohlupuia chuan ngaihtuahin, Zothanpuia hi medical representative licence a hman dik loh avang hian Court chuan thubuai dang a pe a. Lalramdina leh Zothanpuia te hian an thil tihsual an puan avang leh Court chuan an thiamlohna finfiahna tha tawk a hmuh avangin thiamloh chantir a; rim taka thawk chunga thla 4 ve ve lung in tang tur leh Rs. 80000 ve ve chawi turin a hrem. Sumfai chawi tur hi an neih loh chuan thla 4 dang tan belh turin a ti.
Kumin April 10 chawhnu dar 3.30 khan Venglai Lungleiah Suiliana, College Veng Lawngtlai car khalh laiah ruihna atana hman thin khuh damdawi bur 1497 a phurh avangin Excise & Narcotics Department chuan an man a. Damdawi neitu H Lallianpuii, Bazar Veng Lawngtlai pawh hemi zan dar 11.00 ah man lehin, ND&PS Act 1985 hnuaiah thubuai ziahluh a ni. H. Lallianpuii hi Lawngtlai Bazar Vengah an makpa licence hmangin damdawi dawr a nei a, RT Daniels Pharmacy hnuaiah medical representative a ni bawk. Heng damdawi hi H. Lallianpuii’n MR a nihna hmangsuala hralh tumin, Suiliana hi Rs. 6000 hlawh turin a kenkual tir a ni.
An ni pahnih pawh hi Special Court (NDPS Act) Lunglei judge hmaah an thubuai ngaihtuah a ni a, thiamloh chantir an ni. Rim taka thawk chunga lung ina thla 5 ve ve tang tur leh Rs. 90000 ve ve chawi tura hrem an ni a; sum chawi tur hi an neih loh chuan thla 9 dang tan belh turin a ti.