Sawrkarin leimin tuarte chhawmdawl pek ran tum

Mizoram Disaster Management & Rehabilitation secretary K Lalrinzuali chuan Lawngtlai leh Siaha-a lei tlahniam a hmunah tlawhin, chhiatna tuartute tan sawrkarin tanpuina leh chhawmdawlna a hun taka pek a tum thin thu leh sawrkar atanga tih tur tulte chu theihtawpa bawhzui a nih tur thu a sawi.
Kumin May-a Cyclone Mocha leh tunhnaia fur khaw cheng avangin Mizoram hmun hrang hrangah chhiatna a thleng tih K Lalrinzuali hian sawiin, chhiatna karah official leh tlawmngai pawlte leh khawtlang mipui thawh hona a tha thin hle tih a sawi.
Lawngtlai-III leh Lawngtlai Electric Venga lei tlahniam dinhmun chu mithiamte nen uluk taka zirchian hnu ah project liantham tak ruahman tuma hma lak a nih thu a sawi a. Lawngtlai Electric Venga chhungkua 23 chu hmunhim lamah sawn chhuah tawh niin, in ding lai pahnih thiah a ni a. Chhiatna tuartute chhawmdawlna tur pawh District Disaster Management Authority atangin a tul anga bawhzui mek a ni tih a sawi.
Siaha-a New Colony leh College Vaih-a lei chet thinna hmun (sinking area) chu sawrkarin a ngaimawh hle tih sawiin, chief minister pawhin detailed project report chu Ministry of Home Affairs-ah a thehlut tawh tih DM&R secretary hian a sawi a. National Disaster Management Authority-in siamthat ngai a rawn hriattir angin, DPR thar siam turin DC office an hriattir tawh tih a sawi. Siaha district bawrhsap Lalhmunsanga Hnamte chuan District Disaster Management Authority hmalakna in concept paper peihfel a ni tawh a, DPR thar siam tur firm thlang tura hma lak mek a ni tih a sawi a ni.