Ni 18 chhungin hri vei thar awm lo tawh

Covid-19 hrileng a hluar hnu-ah a zia leh mek a, vanneihthlak takin August-ah hri vei hriat thar an awm meuh lo. August ni 9 hnu-ah Mizoramah hri vei hriatchhuah thar an awm rih lo a, tunlaiin Mizoramah hri vei mek an awm lo bawk.
IDSP te’n an chhinchhiah danin, August ni 8-ah khan hri vei hriatchhuah pakhat a awm a, ni 9-ah pathum an awm bawk. Chumi hnuah chuan hriatchhuah thar an awm rih lo a, a chang phei chuan sample endik tur pawh a awm lo thin.
August ni 15 khan hri vei enkawl lai mi pali chu dam takin an chhuak a, mi palite hi hetih laia Mizorama hri vei enkawl mekte niin, anni an chhuah hnuah hri ve enkawl mek hi an awm rih lo.
Kumin kum tir lamah hri hi a zia a, mahse May-ah a hluar. May thlaah hian hri vei zat hi 375 a tling a, June-ah pawh 116 a la tling. July-ah a zia a, August-ah pawh a zia zel rih.
Hnahthial, Lawngtlai, Mamit leh Siaha district-ahte chuan kuminah hri vei hriatchhuah an la awm lo a, Hnahthial district-ah phei chuan hri vei hriatchhuah thar hnuhnun ber hi nikum October ni 3-a mi daih tawh a ni. Siaha district-a hriatchhuah thar ber pawh nikum October ni 6-a mi a ni.
District tam zawkah chuan tun thlaah hri vei hriatchhuah thar an awm lo a, Aizawl leh Serchhip district-ah chauh August thlaa hriatchhuah thar an awm. Aizawl district-a hriatchhuah hnuhnun ber chu August ni 8-a mi a ni a, Serchhip district-a hriatchhuah hnuhnun ber chu August ni 9-a mi a ni.
Chawlhni thleng khan Mizoramah sample 19,96,735 endik a ni tawh a, chung zinga 2,39,559 chu an positive a ni.