Manipur boruak dai deuh rih, India sorkar leh hel pawl inbe dawn
May atanga Zo hnahthlak leh Meitei intihbuaina Manipur-ah an boruak a dai deuh rih a, a hma anga inkah bur bur a awm rih lo. Manipur-a Zo hnahthlak hel pawlte leh India sorkar an inbe dawn a, hemi chungchang hi Zo hnahthlakte’n ngaihtuahin an tuipui rih tih thu dawn a ni. Manipur-a Zo hnahthlak chi bil hruaitu pakhat chuan chawlhkar liam ta leh chumi hma chawlhkar tawp lamah pawh inkah bur bur a awm lo tih a sawi a, “Kan boruak a daih rih a, a lehlam lehlam kan ‘calm’ rih,” tiin The Aizawl Post a hrilh.
An boruak a daih deuh rih tih a sawi rual hian a inven hna erawh thawh reng a ngai tih a sawi a, Meitei lam hi engtikah nge an chet dawn tih hriat lawk a nih loh thu leh inthlahdah theih a nih loh thu te a sawi.
Lamka khawpuiah chuan Chawlhni khan an district-a Zo hnahthlak hrang hrangte intelkhawmna Indegenous Tribals Leaders Forum (ITLF) hruaitute leh Lamka District Private School & College Association te an inbia a, zirna chhunzawm dan tur an sawiho.
Tun hnaiah zirna in thenkhatah chuan zirna an chhunzawm tawh a, mahse zirna in engemaw zatah raltlan an awm avangin zirna chhunzawm thei lo thahnem tak an la awm. Raltlan awmna zirna inte hi tun kar Nilaini thleng hian tihruah tuma hmalak ni se tiin an rel tih thu dawn a ni.
Manipur-a Zo hnahthlak hel pawl hrang hrangte leh India sorkar an inbe dawn a, tun thla ni 30-a Delhi-a inbiak an tum. Hel pawlte hi India sorkar nena inkah hai (suspension of operation) puang mek an ni.
Manipur atanga thu dawn danin, Zo hnahthlak silai lek pawlte hi hlawm hniha then theih an ni a, pawl 15 vel awmna Kuki National Army (KNO) leh pawl 10 vel awmna United People’s Front (UPF) te an awm. Anni hi autonomous district council ngiat an ni hlawm a, mahse tuna Zo hnahthlak leh Meitei intihbuai hnu hian inrelbawlna hran (separate administration), UT aia te lo an ngiat tawh. Hei hi Zo hnahthlak mipuite leh MLA-te thil ngiat pawh a ni a, chuvangin ni 30-a inbiak tur pawh hi Zo hnahthlakte tana thil pawimawh ni turah an ngai.