CM hi peace symbol a ni – Lalruatkima

Mizoram chief minister Pu Zoramthanga chu hnam dang zawng zawngin an hmuh dan chu ‘peace symbol’ a ni tih MNF minister Lalruatkima chuan a sawi.
Thawhtannia MNF office Mizo Hnam Run inkhawmah MNF adviser ni bawk Lalruatkima chuan hnam dang zawng zawngin Pu Zoramthanga an hmuh dan chu ‘peace symbol’ a ni, tiin, India ramah peace symbol dang an awm ve lo tih a sawi. “Bangladesh, Burma leh Manipura kan unaute hian pa ber enin an en thei. Sum leh pai harsatna karah a sing tel kan mikhual thei a. Hruaitu tha kaihhruaina hnuaiah hmalamah beiseina nen kan kal zel a ni,” a ti.
MNF sawrkar thiltih tam tak leh hmachhawp enin hmabak chhunzawm ngai tam tak a awm tih a sawi a. Ram leh hnam himna kawngah pawh MNF hi sawrkar lo se, engtin nge kan hnam hi a awm ang, tiin, “Hnam thuthlung kengtu kan ni a, kan hnam himna hi MNF-ah hian a awm,” a ti.
Ramri buai chungchangah MNF sawrkar lo ta se, Assam lamin Vairengte chhaklam an rawn thut tawh maithei niin minister hian a sawi a. Assam nena ramri buainaah Pathian kan lama a tan tlat avangin hnehna kan chang nin a sawi.
Bru-ten autonomy ngiat a, transit camp-a dah an nih dan leh Mizoram electoral roll-a an awm tlat avangin inthlan dawn apiangin special polling booth siam a ngaih thin thu te a sawi a. MNF a sawrkar a, theitawpin hma an la a. Kumin inthlanah chuan special polling booth siam a ngai tawh dawn lo tih a sawi.
“MNF sawrkar hi kum hnih chhung kan khawngkhawbai a. Kan hmalakna chhunzawm turin kum 5 dang kan sawrkar leh ang. Khawthlang leh chhimlam bial 10 en ila, Pathianin MNF tan kawng a lo sialsa vek a. Hei hi kan hmuh dan mai a ni lo, party dang MLA-te pawhin an hmuh dan a ni,” a ti.
Party dang MLA candidate set an buai hle nia sawiin, “Tling zo lo tura an ngaihte an thlak a. Damlo an awm leh dawn em tiin kan thlir. Congress pawh an party senior hoten Bhavan an tlawh duh loa, an hotupa ber a dictator lutuk an ti,” Lalruatkima hian a ti.