Russia-in Wagner chief thih thu tichiang

Wagner chief Yevgeny Prigozhin chu a ruang genetic analysis neih a nih hnuah a thi ngei tih finfiah a ni ta tiin Russian officials te chuan an sawi.
Investigative Committee (SK) te chuan ruang 10 chu uluk taka enfiahna an neih hnuah finfiahna neih vek a nih tak thu an sawi bawk a.
Prigozhin hi a private jet hmanga an thlawh laiin north-west Moscow-ah 23 August khan chesualin a chhunga chengte chu an thi vek a ni.
Kremlin chuan thlawhna tlaah engmah demna tur an awm loh thu a sawi nghal a. SK te chuan criminal investigation neih chhunzawm zel a nih thu an sawi bawk a.
“Molecular-genetic testing neih zawh fel a ni tawh a. Nunna chan ruang 10 te chu tu te nge an nih finfiah vek tawh a ni,” tiin SK te chuan an tarlang bawk.
He thlawhna tlaa chuangte hi Prigozhina din Russian Mercenary group hruaitu lawkte Ukraine, Syria leh Africa hmunh thenkhata military operation neitute an tel nual a. Thi zingah hian Wagner military operation enkawltu ber Dmitry Utkin pawh a tel a.
Wagner member Valery Chekalov, Sergei propustin, Yevgeny Makaryan, Alexander Totmin leh Nikolay Matuseyev te Embraer Legacy plane hmanga Moscow atanga St Petersburg panah hian an chuang tel bawk a ni.
Thlawhna chu pilot Alexei Levshin leh co-pilot Rustam Karimov tena an khalh niin flight attendant pakhat Kristina Raspopova pawh a tel bawk.
He thlawhna tla hi Progizhin kaihhruai Wagner tena Russian armed forces laka helna kalpuia Moscow pana southern city Rostov an thunun hnu thla hnih leka thleng a ni.
Mahse an helna chu hun rei lo te chhunga chinfel niin Prigozhin leh Wagner fighters te chu Belarus-ah kal tirin an awmzui a ni.
Mahse, Russian President Vladimir Putin chuan helna chu ‘hnung lam atanga invih’ tiin a sawi thung a, tun thlawhna tlaah pawh hian Russian sipaite an inrawlh rinhlelhna a lian hle bawk.
US officials te chuan thlawhna tlakchhan ber chu thlawhna chhunga bomb puak ni ngeia a lan thu an lo sawi sa tawh a ni.