Germany ramah Kane vul chho tan

England captain Harry Kane chuan Bundesliga champion a zawm hnua a match hmasaberah beisei pha loin Germany season thar hawnna inkhel-ah a team tlawm tur chhan zo lo mah se an league game hmasa pahnihah a insiamrem nghal a, Pathiannia a home Bundesliga debut-ah Bayern Munich tan goal hnih khung lehin mikhual FC Augsburg lakah German champion chu 3-1 hnehna a chanpui.
Season thara Bayern league game hmasaberah pawh Kane hian goal thun tawhin, Augsburg lakah a chefuh leh a, ti hian, Kane hi English player zinga Bundesliga game hmasa pahniha goal khung ve ve thei hmasaber leh awmchhun a ni.
Hun puma ball chang tam zawk Thomas Tuchel-a team hian goal pawh thun hmasain, first half minute 32-ah Leroy Sane chuan goal ban petperin, ball letleh chu Augsburg defender Felix Uduokhai chuan an lam goal-ah a tilut.
Chawlhlawk hma minute nga chauh awm tawhah referee Sascha Stegemann chuan Video Assistant Referee a rawn hnuah Niklas Dorsch-a handball chu penalty-ah chantirin Tottenham forward hlui Kane chuan he match-a a goal hmasa zawk leh sihnih faia mualneitu team hmahruaina goal a chhuihlut.
Second half laihawlah Alphonso Davies thawhrah a\angin Kane chuan a goal hnihna a thawh leh a; hun tawp hma minute li chauh awm tawhah substitute Dion Beljo chuan mikhual zangnadawmna goal tilut ve bawk mah se Munich club tan a pawi pha lo.
Kane hian ‘hat-trick’ siam theihna hun remchang hmu mah se goal pawnah a tauhchhuak a; ti hian, Premier League lama Spurs tana a goal thun nen belhkhawmin league match a khelh hnuhnung vawi sarihah goal a thun kim vek a ni.
German Bundesliga table-ah khelh hniha point ruk neiin Bayern hian pahnihna an luah a, hmahruaitu Union Berlin nen point ruk ve ve an kawl mek.
Tarlan tawh \hin angin, kumin nipui thawt laia Bavarians-in league record thar siama euro maktaduai 100 (USD 108 million) zeta an sengluh Kane hian Bayern league season thar bul\anna inkhela sili faia mualneitu Werder Bremen an sawp \um pawh khan goal khung tawhin, karliamta mai khan a nupui chuan an fa palina a hring a, naute thawr lawmna’n Bundesliga lamah goal khung lehin, Bayern player zinga league game vawihnih khelhnaa goal thum thun nghal thei pathumna a nih bakah kum 1993-a chutiang lo ti ve tawh Adolfo Valencia hnu lama chutiang ti leh thei hmasaber a ni nghal.
Nikuma Robert Lewandowski chhuah hnuah Bayern hian goal thun lamah harsatna an tawk zui ta tlat a, chu harsatna sukiang tur chuan league record thar meuh siamin England captain an senglut a, match hnih a khelh tawh a\ang chuan German-ho hian an tisual lutuk dawn lo niin a lang!
An league game hmasa pahnihah a zawnin chak bawk mah se Pathianni zana a naute khelh danah coach Thomas Tuchel a lawm famkim lo a, a bik takin first half-ah an talbuai avang khan a lawm lo zual a, home match khelh laia a naute chet danah duhkhawp a hmu lo. Second half-ah erawh chuan an khel \ha ta zawk tih a tarlang tel.
Bayern leh Union Berlin bakah an hnuaia awm Bayer Leverkusen, VfL Wolfsburg leh Freiburg-te paw’n vawihnih \heuh khelhah point ruk an rut ve bawk.