Goal sarih luhnaa dingchang zawk Barca

Pathianni zan Spanish La Liga inkhel pakhatah Robert Lewandowski chuan chakna goal khungin Villarreal khel-mualah Barcelona chuan 4-3-in mualneitu team an hneh a, khelh thuma point sarih nen league table-ah pathumna an luah chho.
Catalan team hi season thara La Liga game thum an khelh tawhah vawihnih chakin, draw vawikhat an nei a, tlawm la nei loin an title kawl lai humhim tuma an bul\annaah an kechheh a la buai thui lo.
Defending La Liga champion Barcelona hian goal khung hmasain, \an a\anga minute 12-na lekah Lamine Yamal siamsak a\angin Gavi chuan mikhual hma-hruaina goal a tilut a; minute 15-ah Frenkie de Jong chuan khung belhin, sihnih an chhuah hnuah Yellow Submarine beilet hian chawlhlawk hmain an siphurh an sut zo a, he goal hnih hi Juan Foyth leh Alexander Sorloth-te tihluh a ni.
Second half tir lam minute 50-ah Alex Baena chuan mualneitu team hmahruailetna goal thawh ve lehin, a umtu zawkah Barca an \ang.
Minute 68-ah Ferran Torres chuan mikhual siphurh sut ve lehin, 3-3 a nih a\anga minute thum an khelh tlin rualin season liamtaa LaLiga top scorer Lewandowski chuan Xavi Hernandez-a team chakna goal a thawh a, Barcelona hian point hnihin hmahruaitu Real Madrid an la pha lo.
Inkhel pumpui thlirin Villarreal an khel \ha zawk a, mahse, an hun \ha neihah Barca an chefuh leh \hin a, a bik takin rawlthar kum 16 mi Lamine Yamal a che\ha a, mikhual chance hmuh zawng zawng tih theih deuh thaw kha a siamchhuah niin, assist vawikhat a neih bakah goal kham vawihnih a tihper bawk.