Gadar 2-in vbc 456 lalut tawh

Sunny Deol leh Ameesha Patel channa ‘Gadar 2’ chu Indian box office-ah a la che tha viau a, cinema hall ticket hralhna atangin cheng vaibelchhe 500 tal chu lalut thei turin an chhut a, sum lakluh tamah Shah Rukh Khanna ‘Pathaan’ pawh lehpel thei turin an chhut bawk.
Gadar 2 hian a kar khatnaah cheng vaibelchhe 284.63 lalutin, a kar hnihnaah vaibelchhe 134.47 lalut lehin, tun Pathianni kalta khan vaibelchhe 17 a lalut leh bawk a, tihian a vaiin vaibelchhe 456.95 a lalut tling tawh a ni.
‘Gadar 2’ hi Anil Sharma direct niin, a original film 2001-a an tlangzarh ‘Gadar: Ek Prem Katha’ chhunzawmna a ni a, kum 22 hnua a chhunzawmna an siam lehah pawh Sunny leh Ameesha te hi Tara Singh leh Sakeena te lemah bawk an chang leh a, anni bakah hian Gaurav Chopra, Manish Wadhwa leh Luv Sinha ten role pawimawh an chang bawk.
Sunny Deol chuan Gadar 2 hlawhtlin avanga lawmthu sawiin, “A hmasa berin Gadar 2 in lo duh avangin in zavaia chungah lawmthu ka sawi mawlh mawlh. Cheng vaibelchhe 400 kan kai ang tih te chu mumang lamah pawh kan man phak reng reng loh a ni. Heng zawng zawng hi a nih theina chu a entu an awm vang chauh a ni. Tara Singh, Sakeena leh kan zavaiin min lo lawm a, kan lawm takzet e,” a ti.