Ramri tichiang turin Assam nghak

On Aug 30, 2023 26 0

Ramria buaina chinfel tuma hmalaknaah Mizoram chuan a hauh chin a thlen hnu in Assam lamin a la chhanglet lo tih Home minister Lalchamliana chuan a sawi.
Zawhna chhangin Home minister chuan Mizoram leh Assam ramri buai chungchangah tum thum an inhmuh tawh thu sawiin, Assam sawrkar ngen angin ramri bulhnaia Mizoramin a ram hauh chin huamchhung a sawi a. Hengah hian khaw 62 chu Mizoram chin a awm an nih thu ziaka a thlen thu leh a huhoa endik tura an ngenna chu Assam sawrkarin tun thlenga a la chhan loh thu a sawi a ni.
Manipur-a buaina avanga Mizorama sahimna zawnga tlanlutte chhawmdawlna tur chu sawrkar laipuiah Mizoram sawrkarin a dil a, tum hnih an thawt nawn leh hnu ah pawh tun thlengin chhanletna an la dawng lo tih a sawi a. Manipur raltlante chhawmdawl nan Mizoram sawrkarin cheng vaibelchhe 5 a sanction tawh thu te, kohhran, NGO leh political party-ten raltlante chhawmdawlna kawngah theihtawp an chhuah theuh thu te sawiin, tunah hian Manipur atanga sahimna zawnga rawn lut mi 12883 an awm mek tih a sawi a ni.
Home department hnuaia awm Cyber Crime Police Station chu 2020 November 27 khan a hranga awm tanin, kumin July thleng khan thubuai 247 an ziaklut tawh a, thil tisualtu 47 man tawhin, pawisaa inbumnaah Rs. 24,39,755 an hmuhlet sak tawh tih a sawi. Crime and Economic Police Station din thar niin, CID Crime-in a enkawl a, case 10 an nei tawh a ni.
Sawrkarna an chan chhungin police constable 418 an lak tawh thu leh compassionate appointment hmangin mi 286-in Police Training School Thenzawlah training an neih mek thu a sawi bawk.

Home minister thusawi dang thenkhat:

# 3rd IR Bn chu kum 13 chhung Assam-a an awm hnuin Mizoram sawrkar hmalakna in Battalion Hqrs Thingkah, Lawngtlai district-ah an awm tawh.
# Assam leh Mizoram ramri Vairengte ah IR company hqrs sak a ni a; Tripura leh Mizoram inrina duty-te awmna turin Rengdilah Police building leh quarters engemawzat sak a ni.
# Mizoram Police Station 40 leh Out Post 13-ah CCTV dah a ni.
# Myanmar atangin sahimna zawnga Mizoram hmun hrang hranga raltlan mi 31364 an awm a; Mizoram sawrkarin chhawmdawlna atan cheng nuai 384 chuang a pe chhuak tawh.