Iraq-in misual pathum khaihlum

Kum 2016-a Baghdad a vehicle bomb avanga mi 300 chuangin nunna an chan phaha mi za telin hliam an tawrhphahnaa sulsutu mi pathumte chu Iraq chuan a khaihlum dawn.
Islamic thla thianghlim Ramadan laia mipui tena zan lama hun hlimawm an hman laiin bomb tihpuah a ni a. Kum 2003 hnua US in a run hnua Iraq a bomb puakin nunna a lak nasat ber tum a ni bawk.
Heng mi pathumte hi Pathianni emaw Thawhtanniah emaw khan khaihlum an ni a. Prime Minister Mohammed Shia al-Sudani office chuan khaihlum te hming erawh a sawi lang lo thung.
Khaihlum zingah hian kha bomb puaka meizanghlaptu bera ngaih IS mi leh sa Ghazwan al-Zawbaee pawh a tel tia sawi niin kum 2021 khan manin a awm a.
Prime Minister chuan khaihlum te chhungkua chu hrilh hriat an nih thu sawiin bomb puaka inhnam-hnawih leh sulsutu mi pathumte chu khaihlumin an awm’ tiin a sawi.
3 July 2016 khan Iraqi capital Baghdad-a Shia Muslim te chen tamna Karrada a shopping centre mipui tamnaah bomb tihpuahin a awm a.
Nunna chan tam ber te chu bomb-in kangmei a siam avanga thi zui te an ni a. Interior Minister Mohammed Ghabban phei chuan a ban phah hial a ni.
Khatih laia Prime Minster Mustafa al-Kadhimi chuan Zawbaee chu mawhphurtu ber tiin a lo sawi tawh bawk a. Sunni Muslim group IS te hian thawkkhatlai phei chu ram 88,000 sq miles laia zau eastern Iraq atanga Syria thlengin thunun hmanin mi maktaduai riat bawr vel zet an thuhnuaiah an awm hman a ni.
Kum 2017 khan Iraq-ah IS te chu hnehin an awm a, a hnu kum hnihah Syria ah tukzalin an awm leh a, mahse, heng ram pahnihah te hian IS mi leh sa sang tam tak an la awm anga ngaih a ni.
March thla khan UN chuan IS te chuan member “5,000 atanga 7,000 vel lai” an la nei tia sawi niin Iraq leh thenawm Syria ramah te inzarpharhin an zinga a zahve vel zette chu fighters an ni tiin a sawi bawk.