Oliver Anthony Music ‘Rich Men North of Richmond’ a Hot ber

Oliver Anthony Music ‘Rich Men North of Richmond’ a Hot ber
Oliver Anthony Music hla hit ‘Rich Men North of Richmond’ chu Billboard Hot 100 (singles) chart-aha No.1 a, he chart-a a zawna kar hnih a No.1-na a ni ta. Kar liamtaa a No.1 khan Billboard chart hrang hranga vawi khat lannaa Hot 100 chart-a No.1 ni nghal thei hmasa ber record a rawn siam kha a ni a, tunah chuan kar khat chhunga hla stream nasat ber a rawn ni leh ta. Hetihrual hian Doja Cat pawh top 10-ah a rawn lang thar ve leh ta bawk.
Billboard Hot 100 hi kar khat chhunga US-a hla lar dan tehna niin, chart ranking siam nan hian all-genre US streaming (official audio leh official video), rado airplay leh sales data te chu tehna pawimawh a ni.
Rich Men North of Richmond hian kar khat chhungin stream maktaduai 22.9 leh download sales 1,17,000 a nei thei a, radio airplay-ah pawh ngaithlatu an puang sawt hle a, ngaithlatu maktaduai 2.3 a nei ve ta a, kar liamta aiin 310%-in hma a sawn a ni.
Rich Men North of Richmond hian politics lamah pawh nghawng a nei lian hle a, Republican presidential primary debate hmasa berah pawh an chai nghal viau a ni.
Oliver Anthony hi Farmville, Virginia chhuak niin, factory a hnathawk thin a ni a, a hming tak chu Christopher Anthony Lunsford a ni a, a stage name atan a pu Oliver Anthony hming a hmang ta a ni. A tirah rimawi khawvelah tu hriat a hlawh bik lem lo va, mahse, online lamah a lar ta a, TikTok-ah pawh follower maktaduai 2.1 a nei ve der tawh a, record label hnuaia awmna nei miah loin Hot 100 chart-ah a rawn No.1 nghal nawlh thei hian a ropui danglam ve riau a ni.
Luke Combs-a’n Tracy Chapman hla hlui ‘Fast Car’ a cover chu No.2-ah bawk a la awm a, kar sarih chhung No.2-ah a awm ta a, chart No.1 hlui, he chart-a kar 16 No.1 thei Morgan Wallen ‘Last Night’ chu No.3-ah bawk a la awm bawk.
Heti hian Hot 100 chart top three te hi country hla vek niin, kar hnih chhung chu Hot 100 chart top 3-ah country hla a awm ta a, hetianga Hot 100 chart top 3-a country hla vek an intlar hi thil thleng zen zen lo niin, anni ho bakah hian August thla tira Jason Aldean ‘Try That in a Small Town,’ Morgan Wallen ‘Last Night’ leh Luke Combs ‘Fast Car’ te top 3-a an awm ho chiah kha hetiang hi a la thleng a ni.
Taylor Swift ‘Cruel Summer’ chu No.4-ah bawk a la awm a, he hla hian No.3 pawh a lo dai ve zuai tawh a ni.
Doja Cat ‘Paint the Town Red’ chuan radio airplay-ah ngaithlatu maktaduai 21.1 leh sales 5,000 neiin No.15 atangin No.5-ah a invawrh a, Doja Cat hla he chart top 10-a lang thei pasarihna a ni.
Rema leh Selena Gomez ‘Calm Down’ chu No.5 atangin No.6-ah a tawlh a, Gunna ‘Fukumean’ chu No.7-ah bawk la awmin, chart No.1 hlui Olivia Rodrigo ‘Vampire’ chu No.6 atangin No.8-ah a tawlh a, soundtrack Barbie: The Album atanga hla pahnih chu top 10 khartu-ah tangin, Dua Lipa ‘Dance the Night’ chu No.8 atangin No.9-ah a tawlh a, Nicki Minak, Ice Spice leh Aqua ‘Barbie World’ chu No.9 atangin No.10-ah a tawlh ta bawk.