Australian ten referendum nei dawn

Australians te chuan October 14 ah parliament-a Indigenous Voice a awm theih nana an remtih leh tihloh hriat theih nan referendum an nei dawn a, kum tam tak chhunga referendum neih leh hmasak ber tur a ni bawk.
Prime Minister Antony Albanese chuan referendum neih ni tur a puan chian hnuah kar ruk chhung vel hun awmin chung hunah chuan campaign nasa taka neih a ni zui ngei dawn a ni.
Referendum hmangin Constitution tena Parliament ah a Indigenous Voice an neih leh neih loh hriatfiahin a awm thei dawn a, indigenous te hi Australia a ethnic minority dinhmun chhe tak te niin government policy-ah thuk zawkin sawi nei se tih duhna avang a ni.
Albanese chuan mipui te chu ‘yes’ tia vote tura siamin Australia a Indigenous population -Aboriginal leh Torres Straint Islander te chuan an vote ngei rin a ni bawk a.
“Kan duhthlan turah kan chian ngei a ngai a, a chhan chu ‘no’ tih kan vote chuan khawiahmah min thlen dawn lova. A awmzia chu engmah inthlak danglam a awm dawn lo a ni,” tiin Albanese chuan a sawi.
“‘No’ tia vote a nih chuan hma lam panna kawng kharin a awm dawn a. Constitution-in a pawm theihna tur kawng khar lo turin ka ngen che u a, result tha zawk a awm theih nana inkhar lo turin ka ngen che u a ni. Aboriginal leh Torres Strait Islander te atanga ngaihdan chhuak chu kharsak lo turin ka ngen che u a, Indigenous Australians chhuan thar te tan kawng khar lo turin ka ngen che u a ni,” tiin Albanese chuan a sawi.
Australia hian kum 1999 kha referendum an neih hnuhnun ber niin kum 1977 hnuah referendum hmanga passed an la nei lo thung. Eng referendum mah bipartisan support hmu lovin a la tlang lo bawk a, tunah pawh major party te chu an ngaihdan a inang chuang lo.
A tantute chuan Indigenous mi tena policy ah sawi an neih ve chuan hun lo la kal zel turah an tan a tha dawn an ti a. Australia-ah hian Indigenous 3.8% vel awmin Australian mipui nawlpui te aiin kum riat velin an thi hma ziah anga chhut a ni bawk.
Albanese chuan referendum chu hlawhtlingin ‘yes’ duh an tam zawk a beisei thu a sawi a. Chutihrual chuan sawiseltu leh duhlo tam tak an awm bawk.