Meitei vau chungchang sawikhawm

Tunhnaiah Mizorama cheng Meiteite vauna lam thuchhuah a awm avangin Home department chuan hemi kaihhnawiha pawl leh mi thenkhat te kokhawmin a sawipui.
Sawrkar thuchhuah danin, Manipur buaina kaihhnawih nia ngaihah Hmar Students’ Association leh pawl dangten Mizoram Meitei-te laka vauna lam hawi thuchhuah an siam chungchangah Mizoram University leh Pachhunga University College-a Meitei thawk (teaching and non-teaching), campus chhung leh pawna khawsaten an hna an thawh chhunzawm leh thuai theih nana hma laksak turin Mizoram larsap hnenah an ngen a. Hemi bawhzui hian Ningani khan Home secretary, Home official dangte leh Meitei aiawhte an inkawm. Tun dinhmunah, chhungkaw thil avanga pakhat la zawm loh tih loh chu, tunhnaia venthawn thila an khaw lama haw Meiteite hian MZU leh PUC-a an hna an zawm leh vek tawh tih an sawi a. Mizoram sawrkar leh university-a an thawhpuite, a bikin Home department hmalakna chhuanawm an tiin thlamuanthlak an tih thu sawiin, sawrkar leh mipui zahngaihnaah lawmthu an sawi a ni.
Mizoram chu muanawm leh hnathawhna hmun nuam tak a nih thu te, Mizote chu fel an tih thu te an sawi a. University-a an mawhphurhna pawh tha tak leh dik taka thawh zel an tum thu an sawi.
Home secretary chuan Manipur-a chi leh chi inakara buaina a chhuah tan ni, kumin May 3 atang khan district tin bawrhsap leh SP te, thuneitu dangte hnenah Mizorama Meiteite sahimna tura hma la theuh turin Home department chuan a hrilh tih a sawi a. Sawrkarin theihtawp chhuahin Mizorama Meiteite sahim nan hma a la a, a lak chhunzawm zel tur thu pawh a hrilh a ni. Nakin huna harsatna an thawh thulhah an harsatna chu Home department-a thlen zel turin a chah bawk.