Zo hnahthlak leh Meitei kar a dai leh deuh, Sunday School kai tan
Ni li chhung nasa taka an inkah hnuah Inrinni leh Chawlhni lamah kha chuan Manipur-a Zo hnahthlakte leh Meitei kar a dai deuh a, inkah bur bur a awm ta rih lo tih thu dawn a ni. An buai hnuah kohhran lam pawh an inkhawm hlei thei lo a, mahse Chawlhni khan Lamka khawpuiah chuan kohhran pawl hrang hrangte’n Sunday School an nei leh tan.
May thla tira an buai hnuah Manipur state-a Zo hnahthlakte hi an inkhawm thei lo deuh reng a, hmun hnih khatah tih loh chuan biak in inkhawm a hma angin an nei thei lo. |awngtai nan biak in an hawng tho na a, inkhawm pangngai chu an nei lo. September thla Chawlhni hmasa berah Lamka-ah chuan kohhran pawl hrang hrangin Sunday School an hawng a, zan pawh an inkhawm. Mahse zan inkhawm hi a hmaa an inkhawm dan ni lovin, tawngtai inkhawmin hun an hmang.
Lamka atanga thu dawn danin, a huhova rawt leh rel emaw pawh a awm chuang lo a, kohhran pawl hrang hrangte hian inthurual ang maiin Sunday School leh zan inkhawm hi an tan a ni.
Churachandpur district-ah chuan Inrinni leh Chawlhni khan an boruak a dai a, chawlhkar liam ta Thawhlehni atanga Zirtawpni thlenga nasa taka an inkah hnuah inkah bur bur a awm rih lo.
Zirtawpni khan Khousabung leh Chingphei-ah an inkap a, Chingphei hi an inkahna hmun thar a ni. Meitei lam hi Naga khua helin Chingphei lamah hian an kal a, Chingphei-ah Zo hnahthlak lamin an lo chang nia hriat a ni. Khousabung leh Chingphei hi khaw inhnaih an ni a, Churachandpur district ve ve an ni. Chumi hnu-ah chuan an boruak a dai ta deuh a, silai puak thawm hriat tur chu a la awm zeuh zeuh tho tih thu dawn a ni.
Chawlhkar liam ta Thawhlehni-ah khan Khousabung velah an inkap tan a, hmun dang kangkaiin, Churachandpur district hmun li leh Chandel district-a Sugnu-ah an inkap zui a ni. Ni thum chhung hmun ngaa an inkah hnuah Khousabung khua leh a hmaa an inkah lohna Chingphei-ah te an inkap leh a ni.
Zirtawpni-a an inkahnaah hian Zo hnahthlak lam chuan nunna chan an awm lo tih an sawi a, mi pahnihin hliam an tuar tih an sawi bawk. Imphal-a inbun ISTV chuan Meitei lamah mi pahnihin nunna an chan tih an sawi.
Thawhlehni hnuah Zo hnahthlak lamah hian mi 14 velin hliam an tuar nia hriat a ni a, mi pangain nunna an chan nia hriat a ni.