Kristian state nih vanga BJP sawrkarin a thlauhthlakna zawt

Mizoram chu Kristian state a nih avanga central-a BJP sawrkarin a thlauhthlakna a awm leh awm loh BJP National secretary Pawan Sharma chuan zawtin, state sawrkar tha erawh neih a ngai tih a sawi.
Thawhtannia BJP Mizoram Pradesh office-a inkhawm a hmanpuinaah BJP National secretary i/c Assam hian, kum kalta khan Nationa secretary i/c Mizoram-in a lo awm tawh a, khatih laia Mizoram hmelhmang leh vawiina Mizoram hmelhmang chu a la danglam vak lo tih a hmuhin rilru nat thlak a tih thu a sawi a. Hmasawnna hnathawh tam zawk lah sawrkar laipui hmalakna a ni tih a lang reng, tiin, state sawrkar hmalaknaa development hnathawh hmuh hlan a nghahhlehawm tih a sawi.
Hetihlai hian kum 5 kaltaa Assam hmelhmang leh vawiina Assam state BJP sawrkarin development hna a thawh hmuhin a danglam hle tih Pawan Sharma hian a sawi a. Mizorama BJP hlauh inzirtir chu Congress party propaganda lian ber, inthlan dawn apianga nasa taka video siamchawp leh lemchan video an vawrh darh thin a ni tih a sawi. “Chu’ng chu mi tam tak chuan kan lo awih mai thin a, BJP kan hlauh phah ta a, kan state erawh a hnufual ta zel a ni. BJP Pu Modi kaihhruai sawrkar kum 9 chhung hian Mizoram mipui chu harsatna enge kan tawh a, Kristian kan nih vanga sawrkar laipuiin kan thlauhthlakna che u a awm em,” tiin a zawt.
PM scheme hrang hrang chu a nihna angin state sawrkar kan hrawn tawhten an hmang em chu a zawhna a ni tih sawiin, “Development tak tak, mirethei thleng phak hi Mizoram hian kan phu a, state sawrkar tha erawh kan neih a ngai. Sawrkar laipui nen lungrual taka development hna thawk tur state sawrkar hi Mizoram hian kan mamawh a ni,” a ti.