E Lungdar-in zirna centenary lawm

East Lungdar zirna centenary chu Thawhlehni khan lawm a ni a, zirnaa an khuaa mi hmasate leh state awardee hnenah chawimawina an hlan.
He hun hmanpuitu School Education minister Lalchhandama Ralte chuan E. Lungdar-in zirna an dahsang a, centenary hial an lawm chu ropui a tih thu a sawi a. “Zirna dahsang khua hi engtik lai mahin an te ngai loang,” a ti. Kumina State Award to Teachers-ah he khuaa mi Lalengliana Chawnghlut thlan a ni chu phu hlea a hriat thu a sawi.
UPSC-a Mizo thalaite an tlin mai theih loh chhan an inzawt thin tih minister hian sawiin, “Zirnaah ram mamawh chhanna pe turin chhungkua leh khawtlang hian zirna hi number one-ah kan dah a ngai a ni,” a ti. Mizoram sawrkarin zirna a ngaihpawimawh avangin sum harsa leh hrileng karah zirtirtu 2700 chuang lak an ni tawh tih a sawi a ni.
East Lungdar Zirna Centenary lawmna hi September 4 zan atanga September 5 zan thleng khan hman a ni a, hemi hun chhung hian Bazar Kawnah Centenary lungphun chu Nuchhuni (101) chuan a hawng a. Zirnaa mi hlawhtlingte, zirnaa an khuaa mi hmasate leh state awardee to Teacher hnenah chawimawina an hlan. Sikul naupang leh zirtirtute, khawtlang hruaitute, he khuaa sawrkar hnathawk te leh zirnaa hlawhtling an chawimawite an tel a ni.