UK-in Wagner group dan pawnah hnawl

Wagner, Russian mercenary group te chu UK sorkar chuan khap dawnin terrorist group-ah a puang dawn a, chu mi awmzia chu Wagner thlawp emaw zawm emaw chu dan kalh a ni dawn a ni.
Parliament-ah draft order pharh nia pawm fel chuan Wagner te assets te pawh terrorist property tia chhal a ni dawn zui a ni.
UK home secretary of Wagner te chu ‘tharumthawha chhiatna thlentu, Vladimir Putin a Russia military hmanrua’ tiin a sawi.
Wagner tena Ukraine leh Africa-a chetlakna neia an hnathawh chu ‘global security tana hlauhawm’ tiin a sawi bawk a.
Suella Braverman chuan, “Wagner tena an chetlakna hmanga tihchhiat an neih zel chu Kremlin political goal tihhlawhtlin tumna vek a ni” tiin a sawi bawk a.
Wagner te hian Russia-in Ukraine a runna lamah pawh inrawlhna thuk tak neiin hei bakah hian Syria leh Africa ram heng Linya leh Mali angah te pawh sipai dahin chet an la a ni.
Wagner fighters te chu pawikhawihna hrang hrang tualthah leh Ukrainian khua leh tui te nghaisaa puhin an awm bawk a.
Kum 2020 khan US chuan Wagner sipaite chuan Libyan capital, Tripoli leh a chhehvelah chilpuah bomb an kam tiin a sawi bawk.
July thla khan UK group te chuan Wagner te chuan Mali leh Central African Republic ramah te mi nghaisak leh tualthahna nasa takin an kalpui an ti bawk a.
Wagner group te hma lam hun hi kumin kumtir lama an leader Yevgeny Prigozhin hova Russian military leader te laka an hel avangin chiang lo hlea ngaih reng a ni a.
Wagner group kum 2014 a dintu Prigozhin chu Wagner hruaitu lawk dangte nen 23 August khan thlawhna tla rinhlelhawm takah an thi a, St Petersburg-ah phumin an awm zui a ni.
Tunah chuan Wagner hming chu UK-ah pawh khap dang Hamas leh Boko Haram te nen ang khata ngaihin a awm dawn ta a. Terrorism Act 2000 chuan home secretary chu firfiak pawl nia a ngaihte khap theihna a pe a ni.
Kumin kumtir lam daih tawh khan Labour ‘s shadow foreign secretary David Lammy chuan sorkar chu Wagner group te khap tura lo ngen tawhin tuna sorkar thutlukna pawh lawmawm a tih thu a sawi zui bawk a. Hei mai bakah hian sorkar chuan Russian President Putin ber chu hrem a nih ngei theih an Special Tribunal kalpui tura hma la turin a ngen bawk.
Wagner Groyup te hi kumin June thlaa Russian general te laka helna an chawhchhuah hnuah an dinhmun a derthawng ta hlea ngaih a ni a. Tuna UK-in an sum leh paite che thei lova a siam leh anmahni pawh a khap bur takah chuan an chet lak a tiharsa tial tial tawh dawn a ni.