Zach Bryan & Kacey Musgraves ‘I Remember Everything’ a Hot ber
Zach Bryan & Kacey Musgraves ‘I Remember Everything’ a Hot ber
Zach Bryan ‘I Remember Everything’ featuring Kacey Musgraves chu kar khat chhunga US-a hla lar ber niin, Billboard Hot 100 (singles) chart No.1-ah a debut a, an pahnih tan he chart No.1-a an lan vawi khatna ve ve a ni. He hla hi Bryan-a album, tunkar Billboard 200 (albums) chart No.1-a debut tho ‘Zach Bryan’ atanga single a ni bawk. Hetihrual hian Miley Cyrus ‘Used to Be Young’ pawh top 10-ah a debut e.
Billboard Hot 100 chart hi kar khat chhunga US-a hla lar dan tehna niin, chart ranking siam nan hian kar khat chhunga all-genre US streaming (official audio leh official video), radio airplay leh sales data te chu tehna pawimawh a ni.
‘I Remember Everything’ hian kar khat chhungin stream maktaduai 33.7 leh download sales 10,000 neiin, radio airplay-ah ngaithlatu 2,63,000 a nei thei bawk a, hei hi Hot 100 chart-ah a No.1 pui ta a ni. Bryan hian Hot 100 chart-a lang thei hla pali a lo nei tawh bawk a, chung zinga hla pakhat ‘Something in the Orange’ chu No.10 kaiin, he chart top 10-a a lanna hmasa ber niin, chart-ah kar 66 a lang thei a, country singer mipa zinga solo artist anga he chart-a hla lanpui rei thei ber record a siam nghe nghe a ni.
Kacey Musgraves tan pawh tun hi he chart top 10-a a lan vawi khatna leh a No.1 vawi khatna a ni a, a hla dang pathum chu Hot 100 chart-ah lanpui tawhin, mahse, top 60 bak a la pel ngai lo a ni.
A ruala Hot 100 leh Hot Country Songs chart-a No.1 ni ve ve thei hi hla a la tam lo hle a, 1958 atanga Hot 100 chart ranking an siam tan atangin hetiang ni thei hi hla 23 chiah a la awm a, ‘I Remember Everything’ hi a 24-na a ni. Kuminah country music hi a thawm a lian thar hle mai a, US-ah country music hralhna hi nikum nena khai khinin 20.3%-in a thang niin Billboard chuan an tarlang a, tunhnaiah Hot 100 chart-ah pawh hian No.1-ah country hla hlir pali a zawnin an in nih chhawk zak zak a ni.
Luke Combs-a’n Tracy Chapman hla hlui a cover ‘Fast Car’ chu No.2-ah bawk la awmin, kar riat chhung No.2 a ni ta a, Doja Cat ‘Paint the Town Red’ chu No.5 atangin No.3-ah a insawn a, chart No.1 hlui Morgan Wallen ‘Last Night’ chu No.3 atangin No.4-ah a tawlh a, Taylor Swift ‘Cruel Summer’ chu No.4 atangin No.5-ah a tawlh ta bawk.
Chart No.1 hlui bawk Oliver Anthony Music ‘Rich Men North of Richmond’ chu kar hnih a No.1 hnuah No.6-ah a tawlh a, SZA ‘Snooze’ chu No.11 atangin No.7 a kai thar leh ta bawk.
Miley Cyrus hla thar ‘Used to Be Young’ chu radio airplay maktaduai 25.9, stream maktaduai 17.8 leh sales 19,000 tlingin No.8-ah a debut a, he chart top 10-a a hla lang thei 12-na a ni.
Dua Lipa ‘Dance the Night’ chu No.9-ah bawk awm lehin, Gunna ‘Fukumean’ chu top 10 khartu niin, No.7 atangin No.10-ah a tawlh ve thung.