China-in Apple-a hnathawkte hman a khapsak

Chinese sorkar hnathawkte chu iPhones an hman khapsak an nih hnuah Apple hralh chu a zawnin ni hnih a tlahniam nghal tia sawi a ni.
Apple stock market valuation chu 6% chuanga tlahniamin tun nihnih chhunga a tlakhniamna chu $200 billion vel lai tia sawi a ni bawk a.
China hi Apple market lian ber pathumna niin nikum khan an revenue hmuh 18% chu China atanga an hmuh a ni a. Chu mai bakah Apple product te chu an supplier lian ber Foxconn tena an siamchhuahna hmun ber a ni bawk.
The Wall Street Journal report chuan Nilaini khan Beijing chuan central sorkar hnuaia agency officials te chu office-ah iPhone keng tawh lo turin a hriattir tiin a sawi a.
He mi hnu lawk hian Bloomberg News chuan State-owned company leh sorkar kaihhnawih agency tin te chuan an hnathawk tena Apple iPhone an hman chu an khap zui an ti bawk.
Hetih lai hian September 12 hian iPhone 15 chu tlangzarh tum mek a ni thung a. Chinese sorkar chuan heng report-ah hian sawifiahna emaw thu leh hla engmah siam a la nei lo bawk.
Washington leh Beijing inkar boruak chu a la sang hle zel a. Kuminah Washington bakah a thawhpui Japan leh the Netherlands te chuan China-in chiptechnology pawimawh a hmuh thin thenkhatte chu an la hreksak tawh bawk a.
Beijing pawhin ram dang siam chip a innghah zui zel loh nan chip making industry tihchangtlun nan $40 billion investment a tithar tia sawi a ni bawk.
Kar kalta khan US Commerce Secretary Gina Raimondo chuan Beijing a tlawh laiin Chinese tech giant huawei te chuan sawi lawk lohin an smartphone changkang Mate 60 Pro chu an tlangzarh a.
Canada-based technology research girm, TechInsights te chuan he phone thar hian 5G Kirin 9000s processor, Huawei tana liau liaua China chip siamtu lian ber SMIC tena an siam chu a keng tel a ti a.
TechInsight analysts Dan Hutchenson chuan hei hian China semiconductor industry-in hma a sawnzia a pholang tiin a sawi zui bawk.
Chutih lai chuan tunkar chhung ngeiin US congressman Mike Gallagher, chairman of the House of Representatives committee on China chuan Commerce Department te chu Huawei leh SMIC te laka chips nasa zawka hrek turin a ngen thung.